३३ लाख विद्यार्थी विना ‘आधार कार्ड’; पुणे जिल्ह्यात सर्वाधिक सदोष आधार कार्ड

नंदोरी (जि. वर्धा) : शासनातर्फे शिक्षणाचा दर्जा वाढविण्यासाठी विद्यार्थ्यांना विविध योजनांचे लाभ देण्यात येतात. यासाठी विद्यार्थ्यांचे आधार कार्ड अद्ययावत करण्याच्या सूचना करण्यात आल्या आहेत. असे असतानाही राज्यात तब्बल ३३ लाख २५ हजार ४७५ विद्यार्थ्यांजवळ आधार कार्ड नसल्याची माहिती पुढे आली आहे. राज्यात पहिली ते बारावीपर्यंतच्या २४ लाख ६८ हजार ५०९ तर विदर्भातील ६ लाख ३० हजार ५०७ विद्यार्थ्यांच्या आधार कार्डमध्ये त्रुटी आढळून आल्या आहेत. यात राज्यात सर्वाधिक पुणे जिल्ह्यात २ लाख ४८ लाख ४०७ विद्यार्थ्यांच्या कार्डमध्ये त्रुटी आहे. तर विदर्भातील नागपूर जिल्ह्यातील १ लाख ६३ हजार ६४४ कार्डात त्रुटी आहेत.

शिक्षण विभागाच्या माहितीनुसार राज्यात एकूण २ कोटी २१ लाख ३१ हजार ४७२ विद्यार्थ्यांची पोर्टलवर नोंद आहे. त्यापैकी १ कोटी १८ लाख ५ हजार ९९७ विद्यार्थ्यांची आधार नोंदणी आहे. तर ३३ लाख २५ हजार ४७५ विद्यार्थ्यांची आधार नोंदणी नाही. तर १ कोटी १० लाख ५८ हजार ५६५ विद्यार्थ्यांची आधार पडताळणी सुरू आहे. राज्यात एकूण ८५ लाख ९० हजार ५६ विद्यार्थ्यांचे आधार वैध असून २४ लाख ६८ हजार ५०९ विद्यार्थ्यांच्या आधारमध्ये त्रुटी आहेत. शालेय शिक्षण विभागाच्या विविध योजना पात्र विद्यार्थ्यांपर्यंत पोचवण्यासाठी संचालनालयाने आधार कार्ड अपडेट करण्याबाबत कळविले आहे.

आधारकार्डची सद्य:स्थिती

• २ कोटी २१ लाख ३१ हजार ४७२ - एकूण विद्यार्थी

• ३३ लाख २५ हजार -आधार नसलेले

• १ कोटी १८ लाख ५ हजार ९९७ - आधारकार्डधारक

• १ कोटी १८ लाख ५ हजार ९९७ - पडताळणी सुरू असलेले