पाचवी, आठवीची शिष्यवृत्ती परीक्षेच्या तारखेत पुन्हा बदल

पुणे : इयत्ता पाचवी आणि आठवीची आठ ऑगस्ट रोजी होणारी शिष्यवृत्ती परीक्षा पुन्हा एकदा पुढे ढकलण्यात आली आहे. आता ही परीक्षा नऊ ऑगस्टला होणार असल्याची माहिती महाराष्ट्र राज्य परीक्षा परिषदेने जाहीर केले आहे. आतापर्यंत या परीक्षेच्या तारखा तीन वेळा बदलण्यात आल्या आहेत. परीक्षेच्या तारखेत सातत्याने होत असलेले बदलामुळे फेब्रुवारीपासून परीक्षेच्या प्रतीक्षेत असणाऱ्या विद्यार्थ्यांचा ताण मात्र वाढत असल्याचे दिसून येते.

या शिष्यवृत्ती परीक्षेसाठी ४७ हजार ६१६ शाळांमधील तब्बल सहा लाख ३२ हजार ६६७ विद्यार्थ्यांनी नोंदणी केली आहे. राज्यातील पाच हजार ६८७ केंद्रावर ही परीक्षा होणार आहे. ही शिष्यवृत्ती परीक्षा दरवर्षी फेब्रुवारीच्या दुसऱ्या किंवा तिसऱ्या रविवारी घेण्यात येते. परंतु यंदा एप्रिल महिन्यात घेण्याचा प्रस्ताव सुरवातीला परीक्षा परिषदेने राज्य सरकाला दिला होता. त्यानंतर कोरोनाच्या प्रादुर्भावामुळे ही परीक्षा पुढे ढकलण्यात आली आणि परीक्षा २३ मे रोजी घेण्याचे निश्चित केले. दरम्यान कोरोनाचा संसर्ग आणि तांत्रिक कारणास्तव ही परीक्षा अनिश्चित काळासाठी पुढे ढकलण्याचा निर्णय घेण्यात आला.

दरम्यान २० जुलै रोजी जाहीर केलेल्या निर्णयानुसार या परीक्षेसाठी आठ ऑगस्ट ही तारीख निश्चित करण्यात आली. आता पुन्हा ही तारीख बदलली आहे. केंद्र सरकारमार्फत घेण्यात येणारी सेंट्रल आर्म पोलिस फोर्स या पदासाठीची लेखी परीक्षा राज्यातील काही जिल्ह्यांमध्ये आठ ऑगस्ट रोजी घेण्यात येणार आहे. आता आठ ऑगस्ट ऐवजी नऊ ऑगस्ट रोजी ही परीक्षा घेण्यात येणार असल्याचे महाराष्ट्र राज्य परीक्षा परिषदेचे आयुक्त तुकाराम सुपे यांनी जाहीर केले आहे. त्यामुळे पाचवी आणि आठवीची शिष्यवृत्ती परीक्षा पुढे ढकलण्यात आली आहे. परीक्षेचे प्रवेशपत्र शाळांच्या लॉगिनमध्ये मंगळवारपासून उपलब्ध करून देण्यात आले असल्याचेही परिषदेने स्पष्ट केले आहे.

‘शिष्यवृत्ती परीक्षा २०२१’ :

• - पाचवीच्या विद्यार्थ्यांची संख्या : ३,८८,४०५

• - आठवीच्या विद्यार्थ्यांची संख्या : २,४४,२६२

• - एकूण विद्यार्थी : ६,३२, ६६७

• - शाळांची संख्या : ४७,६१६

• - परीक्षा केंद्रांची संख्या : ५,६८७