भारतीय सैन्यात 'या' पदांसाठी भरती; लेखी परीक्षेशिवाय होणार निवड

Indian Army Recruitment 2022 : भारतीय सैन्यात (Indian Army) नोकरीसाठी (Government Jobs) इच्छुक असलेल्या तरुणांकरिता एक आनंदाची बातमी आहे. भारतीय लष्करानं अलीकडेच 8 मार्च रोजी पुरुष उमेदवारांसाठी 59 व्या शॉर्ट सर्व्हिस कमिशन (टेक) आणि महिला उमेदवारांसाठी 30 व्या शॉर्ट सर्व्हिस कमिशन (टेक) प्रवेशाची जाहिरात प्रसिद्ध केलीय. या 191 पदांसाठी अर्ज करण्याची प्रक्रिया देखील सुरू झालीय. दरम्यान, उमेदवार 6 एप्रिल 2022 पर्यंत ऑनलाइन अर्ज करू शकतात. इच्छुक उमेदवार भारतीय लष्कराच्या अधिकृत joinindianarmy.nic.in वेबसाइटद्वारे आपला अर्ज करू शकतात.

कोण अर्ज करू शकतो?

इंडियन आर्मीच्या एसएससी भरतीसाठी इच्छुक असलेल्या उमेदवारांनी मान्यताप्राप्त विद्यापीठ किंवा इतर कोणत्याही उच्च शिक्षण संस्थेतून अभियांत्रिकी पदवी उत्तीर्ण केलेली असावी. तसेच उमेदवारांची निवड झाल्यास त्यांना 1 ऑक्टोबर 2022 पर्यंत पदवीची प्रत सादर करावी लागेल. 1 ऑक्टोबर 2022 रोजी उमेदवारांचं वय 20-27 वर्षे असावं. याचाच अर्थ उमेदवाराचा जन्म 2 ऑक्टोबर 1995 पूर्वी झालेला नसावा आणि 1 ऑक्टोबर 2002 नंतर झालेला नसावा.

लेखी परीक्षेशिवाय होणार निवड

इंडियन आर्मीच्या SSC भरतीसाठी उमेदवारांची निवड सेवा निवड मंडळाद्वारे (Services Selection Board) आयोजित केलेल्या पाच दिवसांच्या मुलाखत प्रक्रियेद्वारे केली जाईल. या मुलाखतीसाठी उमेदवारांना त्यांच्या पात्रता पदवी गुणांच्या आधारे निवडलं जाईल. शॉर्टलिस्ट केलेल्या उमेदवारांना गुणवत्तेनुसार SSB साठी बोलावलं जाईल. यात यशस्वी झालेल्या उमेदवारांची वैद्यकीय तपासणीही केली जाणार आहे.