‘टीईटी’ परीक्षेची अंतरिम उत्तरसूची जाहीर

पुणे : महाराष्ट्र राज्य परीक्षा परिषदेमार्फत घेण्यात आलेल्या शिक्षक पात्रता परीक्षेची (टीईटी) पेपर क्रमांक एक आणि पेपर क्रमांक दोनची अंतरिम (तात्पुरती) उत्तरसूची प्रसिद्ध करण्यात आली आहे.

राज्यात २१ नोव्हेंबर रोजी शिक्षक पात्रता परीक्षा घेण्यात आली. याच्या टीईटी परीक्षेच्या ‘पेपर क्रमांक एक’साठी दोन लाख ५४ हजार ४२८ उमेदवारांनी नोंदणी केली होती. यातील दोन लाख १६ हजार ६०४ उमेदवार उपस्थित होते. तर ३७ हजार ८२४ अनुपस्थित होते. या परीक्षेच्या ‘पेपर क्रमांक दोन’साठी दोन लाख १४ हजार २५१ उमेदवारांची नोंदणी झाली होती. यातील एक लाख ८५ हजार ४३९ उमेदवार उपस्थित होते. तर २८ हजार ८१२ अनुपस्थित होते. एकूण ६६ हजार ६३६ उमेदवार गैरहजर होते.

या परीक्षेच्या पेपर क्रमांक एक आणि दोन याबाबत प्रश्नपत्रिकेतील कोणत्याही प्रश्नाबाबत किंवा पर्यायी उत्तराबाबत त्रूटी किंवा आक्षेप असल्यास ते परीक्षा परिषदेकडे सादर करण्यासाठी आठ डिसेंबरपर्यंत मुदत आहे. आक्षेप किंवा त्रुटी ‘http://mahatet.in’ या संकेतस्थळावर परीक्षार्थ्यांच्या लाँगिनमध्ये उपलब्ध करून देण्यात आलेल्या आक्षेप नोंदणी या लिंकद्वारे परिषदेकडे पाठविता येणार आहेत.

आक्षेपाबाबत लेखी निवेदन समक्ष, टपालाने किंवा ई-मेलद्वारे पाठविल्यास त्याचा विचार केला जाणार नाही. परिषदेने दिलेल्या मुदतीत ऑनलाइनरित्या प्राप्त झालेल्या आक्षेपाचा विचार करून विषय तज्ञांच्या अभिप्रायानुसार अंतिम उत्तरसूची यथावकाश प्रसिद्ध करण्यात येणार आहे, याची उमेदवारांनी नोंद घ्यावी, असे महाराष्ट्र राज्य परीक्षा परिषदेच्या उपायुक्त शैलजा दराडे यांनी स्पष्ट केले.