बारावीच्या परीक्षेचा अर्ज भरण्यासाठी १२ डिसेंबरपर्यंत मुदतवाढ

पुणे : महाराष्ट्र राज्य माध्यमिक व उच्च माध्यमिक शिक्षण मंडळातर्फे २०२२मध्ये घेण्यात येणाऱ्या बारावीच्या परीक्षेसाठी नियमित शुल्कासह अर्ज भरण्यासाठी १२ डिसेंबरपर्यंत, तर विलंब शुल्कासह अर्ज करण्यासाठी २० डिसेंबरपर्यंत मुदतवाढ दिली आहे, अशी माहिती मंडळाचे सचिव डॉ. अशोक भोसले यांनी दिली.

राज्य शिक्षण मंडळामार्फत २०२२मध्ये घेण्यात येणाऱ्या बारावीच्या परीक्षेसाठी नियमित विद्यार्थ्यांचे अर्ज (आवेदन पत्रे) सरल डेटाबेसवरून ऑनलाइन पद्धतीने गुरुवारपर्यंत (ता.२) मुदत होती. तर व्यवसाय अभ्यासक्रम शाखेचे नियमित विद्यार्थी (एचएससी व्होकेशनल) व सर्व शाखांचे पुनर्परीक्षार्थी, यापूर्वी नाव नोंदणी प्रमाणपत्र प्राप्त झालेले खासगी विद्यार्थी, श्रेणी सुधार योजनेतंर्गत विद्यार्थी व तुरळक विषय घेऊन परीक्षा देणारे विद्यार्थी, तसेच आयटीआयद्वारे ट्रान्स्फर ऑफ क्रेडिट घेणारे विद्यार्थी यांना बारावीच्या परीक्षेसाठी अर्ज करण्यासाठी ३ ते ११ डिसेंबरपर्यंत मुदत दिली होती.  

परंतु परीक्षेसाठी ऑनलाइन अर्ज भरताना उच्च माध्यमिक शाळा आणि कनिष्ठ महाविद्यालयांना अनेक तांत्रिक व इतर अडचणी येत असल्याचे निदर्शनास आले आहे. त्यामुळे मंडळाने अर्ज भरण्यासाठी मुदतवाढ दिली आहे. उच्च माध्यमिक शाळा, कनिष्ठ महाविद्यालयांनी चलन डाऊनलोड करून बॅंकेत चलनाद्वारे शुल्क भरण्यासाठी राज्य मंडळाने २५ डिसेंबरपर्यंत मुदत दिली आहे. बारावीच्या परीक्षेसाठी अर्ज ऑनलाइन पद्धतीने भरण्यासाठी ‘www.mahahsscboard.in’ या संकेतस्थळाला भेट द्यावी, असे आवाहन राज्य मंडळाने केले आहे.