MPSC News : कर सहाय्यकाच्या पात्रता यादीवर उमेदवारांचा आक्षेप; त्रुटींमुळे अपात्र उमेदवार कौशल्य चाचणीसाठी पात्र?

पुणे : राज्य कर सहाय्यक पदासाठी घोषित झालेल्या टंकलेखन कौशल्य चाचणीच्या पात्रता यादीवर काही उमेदवारांनी आक्षेप घेतला आहे. मराठी आणि इंग्रजी या दोन्ही भाषांचे टंकलेखन प्रमाणपत्र नसताना काही विद्यार्थ्यांना पात्र ठरविले आहे. तसेच लिपिक व टंकलेखकांसाठीचे नियम कर सहाय्यक पदासाठी गृहीत धरल्यामुळे अन्याय झाल्याची भावना काही उमेदवारांनी व्यक्त केली आहे.

महाराष्ट्र लोकसेवा आयोगामार्फत (एमपीएससी) नुकतेच महाराष्ट्र अराजपत्रित गट-क सेवा संयुक्त मुख्य परीक्षा २०२३ कर सहाय्यक या पदाचा कौशल्य चाचणीसाठीचा निकाल प्रसिद्ध केला. त्याबद्दल राजेश सांगतो, ‘‘कर सहायक टंकलेखन कौशल्य चाचणीसाठी पात्र नसताना काही उमेदवार पात्र ठरविण्यात आले आहेत. कर सहाय्यक पदासाठी मराठी आणि इंग्रजी दोन्ही टंकलेखन प्रमाणपत्र आवश्यक आहेत. तरीही एक प्रमाणपत्र असलेल्यांना पात्र ठरविण्यात आले आहेत.तसेच एकही टंकलेखन प्रमाणपत्र नसणारे, प्रकल्पग्रस्त ,भूकंपग्रस्त ,पदवीधर, अंशकालीन उमेदवार, माजी सैनिक कर सहायक साठी पात्र केले गेले आहेत. पण हे आरक्षण लिपिक व टंकलेखकांसाठी आहे. ते कर सहाय्यक पदासाठी लागू नाही. म्हणून ते अपात्र असायला हवेत.’’

आयोगाने दोन्ही प्रमाणपत्र असलेले, पण कर सहायक पूर्व परीक्षा ज्या उमेदवारांनी पास केलेली नाही. ते देखील कौशल्यचाचणीसाठी पात्र ठरवले असल्याचा आरोपही उमेदवाराने केला. आयोगाने तातडीने त्रुटी दुरुस्त करत कौशल्य चाचणीसाठी पात्र उमेदवारांची पुन्हा घोषणा करावी, असे आवाहन उमेदवारांनी केले आहे. तसेच यासंबंधीचा इमेल एमपीएससीला पाठविल्याचे उमेदवारांनी सांगितले.