NAAC Assessment : महाविद्यालयांची संलग्नता काढण्यासंदर्भातील अहवाल सादर करण्यासाठी विद्यापीठांना गुरुवारपर्यंत मुदत

पुणे - नॅक मूल्यांकन आणि पुनर्मूल्यांकन न करणाऱ्या महाविद्यालयांची संलग्नता काढून घेण्यासंदर्भात आतापर्यंत केलेल्या कार्यवाहीचा विस्तृत अहवाल आता राज्यातील सर्व विद्यापीठांना येत्या गुरुवारपर्यंत (ता.७) उच्च शिक्षण संचालनालयास सादर करावा लागणार आहे.

‘नॅक मूल्यांकन’ न करणाऱ्या महाविद्यालयांच्या यादीसह संलग्नता काढण्याबाबत केलेल्या कार्यवाहीचा तपशील मागविण्यात आल्याची माहिती राज्याचे उच्च शिक्षण संचालक डॉ. शैलेंद्र देवळाणकर यांनी दिली.

शैक्षणिक वर्ष २०२३-२४ च्या प्रथम वर्ष प्रवेशाच्या प्रारंभापासून नॅक मूल्यांकन आणि पुनर्मूल्यांकन केलेले नाही, अशा महाविद्यालयांबाबत संलग्नता काढून घेण्याची कार्यवाही करावी आणि कार्यवाहीचा अहवाल सादर करावा, असा आदेश उच्च शिक्षण संचालनालयाने यापूर्वी दिला होता.

महाराष्ट्र सार्वजनिक विद्यापीठ अधिनियम २०१६ नुसार ही कार्यवाही करावी, अशी सूचना दिली होती. परंतु, राज्यातील विद्यापीठांकडून अपेक्षित प्रतिसाद न मिळाल्याने अखेर डॉ. देवळाणकर यांनी पुन्हा सर्व विद्यापीठांना कार्यवाहीबाबतचा वस्तुनिष्ठ अहवाल येत्या दोन दिवसांत पाठविण्यास सांगितले आहे.

संलग्नता काढून घेतलेल्या महाविद्यालयांची यादी शिक्षण विभागाने विद्यापीठांकडून मागविली आहे. या संदर्भात उच्च शिक्षण विभागाने २३ मे आणि ९ ऑगस्ट रोजी सर्व विद्यापीठांना नॅक मूल्याकंनाबाबत कळविले होते. पण तरीही विद्यापीठांकडून प्रतिसाद न मिळाल्याने आता अहवाल सादर करण्यासाठी दोन दिवसांची मुदत दिली आहे.

काही विद्यापीठांनी यासंदर्भात अहवाल सादर केला आहे. त्यात केवळ कार्यवाही सुरू असून लवकरच अहवाल सादर करण्यात येईल, असे आश्वासन दिले आहे. परंतु संबंधित विद्यापीठांना कार्यवाहीची वस्तुनिष्ठ माहिती नमूद करावी लागणार आहे. महाविद्यालयांची संलग्नता काढून घेण्यासंदर्भात विद्यापीठांनी त्या महाविद्यालयांच्या नावाच्या यादीसह केलेल्या कार्यवाहीचा अहवाल संचालनालयास अपेक्षित आहे.

अद्याप मूल्यांकन न करणाऱ्या महाविद्यालयांची यादी न दिलेल्या, कार्यवाहीचा अहवाल देण्याचे आश्वासन दिलेल्या आणि अद्याप कोणताही माहिती न दिलेल्या अशा सर्व विद्यापीठांनी येत्या गुरुवारपर्यंत (ता.७) विस्तृत माहितीसह अहवाल सादर करावा, असा आदेश डॉ. देवळाणकर यांनी सर्व विद्यापीठांना दिला आहे.