शिक्षण चिंतन : कौशल्याधारित व्यावसायिक शिक्षण

डॉ. मिलिंद नाईक प्राचार्य, ज्ञानप्रबोधिनी प्रशाला

आजच्या आधुनिक, तंत्रज्ञानप्रधान आणि स्पर्धात्मक जगात शिक्षणाची भूमिका मोठ्या प्रमाणात बदलली आहे. केवळ सैद्धान्तिक ज्ञान देणे हे शिक्षणाचे उद्दिष्ट राहिलेले नाही, तर विद्यार्थ्यांना प्रत्यक्ष जीवनात उपयोगी पडणारी कौशल्ये विकसित करणे ही गरज बनली आहे. नवीन अभ्यासक्रमांमध्ये शिक्षणाला ‘प्रत्यक्ष कामाशी जोडणे’ ही मूलभूत कल्पना आहे. हे शिक्षण स्थानिक गरजा, रोजगाराच्या संधी आणि आर्थिक परिस्थिती यांच्याशी जोडलेले अपेक्षित आहे. त्यामुळे विद्यार्थ्यांना केवळ शिक्षण घेऊन थांबायचे नाही, तर त्याचा उपयोग जीवनात कसा करायचा आणि आर्थिक उत्पन्न कसे मिळवायचे हेही शिकायचे आहे. या पार्श्वभूमीवर राष्ट्रीय शिक्षण धोरणाच्या आधाराने विकसित करण्यात आलेली ‘कौशल्य बोध’ ही इयत्ता सहावी ते नववीसाठीची व्यावसायिक शिक्षणाची पुस्तके या बदलांसाठी अतिशय उपयुक्त आहेत. यामध्ये विद्यार्थ्यांना व्यावसायिक तीन प्रकारच्या कामांची ओळख करून देण्यात आली आहे.