‘पेरा सीईटी’साठी ऑनलाईन अर्ज करण्यासाठी मंगळवारपर्यंत मुदतवाढ

पुणे - प्रीमिनन्ट एज्युकेशन ॲण्ड रिसर्च असोसिएशन (पेरा) या खासगी विद्यापीठांच्या संघटनेच्या ‘पेरा सीईटी’साठी ऑनलाइन अर्ज करण्यासाठी येत्या मंगळवारपर्यंत (ता.२८) मुदतवाढ दिली आहे.  ही सीईटी परीक्षा ३० जून, १ आणि २ जुलै दरम्यान ऑनलाइनद्वारे घेतली जाणार आहे.

शैक्षणिक वर्ष २०२२-२३ साठी अभियांत्रिकी, जैवअभियांत्रिकी, मरिन अभियांत्रिकी, डिझाइन, फाइन आर्टस्‌, फूड टेक्नॉलॉजी, औषधनिर्माणशास्त्र, व्यवस्थापन, शिक्षण, आर्किटेक्चर, विधी आणि कृषी अभियांत्रिकी या विविध अभ्यासक्रमाच्या प्रवेशासाठी ही परीक्षा होणार आहे. या परीक्षेचा निकाल ९ जुलै रोजी जाहीर करण्यात येईल, अशी माहिती ‘पेरा’तर्फे देण्यात आली आहे.

या प्रवेश परीक्षेतील गुणांच्या आधारे विद्यार्थ्यांना राज्यातील १५ खासगी विद्यापीठांमधील विविध व्यावसायिक अभ्यासक्रमांसाठी प्रवेश अर्ज करता येणार आहे. याबाबत अधिक माहितीसाठी विद्यार्थ्यांनी ‘www.peraindia.in’ या अधिकृत संकेतस्थळाला भेट द्यावी, असे आवाहन ‘पेरा इंडिया’चे अध्यक्ष डॉ. मंगेश कराड आणि उपाध्यक्ष भरत अग्रवाल यांनी केले आहे.