राज्यात ‘शाळा व्यवस्थापन प्रणाली’ विकसित करण्याचा मार्ग मोकळा

शाळा, विद्यार्थी व शिक्षकांची माहिती ठेवण्यासाठी व त्यासंबंधी शैक्षणिक व प्रशासकीय नियोजनासाठी राज्य सरकारने सरल प्रणाली आणि केंद्र सरकारने ‘युडायस’ प्रणाली कार्यान्वित केली आहे.

पुणे - राज्यातील सर्व शाळा, शिक्षक, विद्यार्थी यांची माहिती संकलित करण्यासाठी सरल प्रणाली व युडायस प्रणाली यांचे एकत्रीकरण करून ‘शाळा व्यवस्थापन प्रणाली’ विकसित करण्यासाठी शालेय शिक्षण विभागाने २९.६६ कोटी रुपयांच्या खर्चास मंजुरी दिली आहे. त्यामुळे ही संगणक प्रणाली प्रत्यक्षात विकसित होण्याचा मार्ग मोकळा झाला आहे.

शाळा, विद्यार्थी व शिक्षकांची माहिती ठेवण्यासाठी व त्यासंबंधी शैक्षणिक व प्रशासकीय नियोजनासाठी राज्य सरकारने सरल प्रणाली आणि केंद्र सरकारने ‘युडायस’ प्रणाली कार्यान्वित केली आहे. या माहितीचा उपयोग शालेय शिक्षण विभागामार्फत विविध प्रकारचे नियोजन करणे, पर्यवेक्षण व संनियंत्रण करणे यासाठी केला जातो. तसेच शाळा आणि विद्यार्थी यांच्याशी संबंधित विविध योजनांच्या अंमलबजावणीसाठी या दोन्ही प्रणाली उपयुक्त ठरतात.

शाळा स्तरावरील संपूर्ण माहिती संकलित करण्यासाठी आजपर्यंत सरल आणि युडायस या दोन्ही प्रणाली स्वतंत्ररीत्या कार्यान्वित आहेत. शाळांना विद्यार्थी, शिक्षक त्यांची माहिती या दोन्ही प्रणालींमध्ये स्वतंत्रपणे भरावी लागते.

दरम्यान, या एकच माहिती पुन्हा-पुन्हा नोंदविली जाण्याची आणि माहिती न जुळणे या सारखे प्रकार होण्याची शक्यता आहे. हे टाळण्यासाठी शालेय शिक्षण विभागाने या दोन्ही प्रणालीचे एकत्रीकरण करून ‘शाळा व्यवस्थापन प्रणाली’ (स्कूल मॅनेजमेंट सिस्टिम) ही संगणक प्रणाली विकसित करण्याच्या प्रस्तावास ९ जून २०२१ रोजी प्रकल्प अंमलबजावणी समितीच्या बैठकीत मान्यता दिली. या प्रकल्प अंमलबजावणी समितीच्या बैठकीत घेतलेल्या निर्णयाप्रमाणे शाळा व्यवस्थापन प्रणाली विकसित करण्याचा निर्णय सरकारने घेतला असून त्यासाठी खर्चास नुकतीच मान्यता दिली असून याबाबत शालेय शिक्षण विभागाचे उपसचिव समीर सावंत यांनी अध्यादेशाद्वारे माहिती दिली आहे.