दहावी-बारावीच्या विद्यार्थ्यांना समुपदेशक देणार आधार

पुणे : महाराष्ट्र राज्य माध्यमिक व उच्च माध्यमिक शिक्षण मंडळातर्फे मार्च-एप्रिलमध्ये घेण्यात येणाऱ्या बारावी आणि दहावीच्या लेखी परीक्षेच्या काळात विद्यार्थ्यांना नकारात्मक विचाराने किंवा परीक्षेच्या भीतीने मानसिक दडपण येऊ नये, यासाठी ऑनलाइन समुपदेशन करण्यात येणार आहे. यासाठी राज्यमंडळ स्तरावरून समुपदेशकांची नियुक्ती करण्यात आली आहे.

परीक्षेच्या काळात अनेक विद्यार्थी नकारात्मक विचाराने किंवा परीक्षेच्या भीतीने मानसिक दडपणाखाली असतात. अशा विद्यार्थ्यांना नैराश्यातून बाहेर काढण्यासाठी राज्यमंडळ स्तरावरून समुपदेशकांची नियुक्ती करण्यात आली आहे. राज्य मंडळाने नियुक्त केलेल्या समुपदेशकांच्या भ्रमणध्वनी क्रमांकांची यादी मंडळाच्या अधिकृत संकेतस्थळावर उपलब्ध असेल.

भ्रमणध्वनी क्रमांक दिलेले समुपदेशक हे परीक्षा कालावधीत सकाळी आठ ते रात्री आठ या वेळात विद्यार्थ्यांना निःशुल्क आवश्यक ते समुपदेशन करतील. मात्र, विद्यार्थी, पालक यांनी परीक्षा केंद्र, बैठक व्यवस्था व प्रश्नपत्रिकेसंबंधित प्रश्न याबाबत समुपदेशकांना विचारणा करू नये, असे आवाहन राज्य मंडळाचे सचिव डॉ. अशोक भोसले यांनी केले आहे.