पालक सूप प्यायल्याने हिमोग्लोबिन वाढते; जाणून घ्या रेसिपी

हिरव्या पालेभाज्यांमधील (Leafy vegetables) एक महत्त्वाची भाजी म्हणजे पालक (Spinach). आजकाल बाजारात पालक सहजतेने उपलब्ध होते. चवीला थोडी कडवट असली, तरी ती आरोग्यासाठी ती खूपच फायदेशीर असते. पालकमध्ये भरपूर प्रमाणात लोह (iron) असते, त्यामुळे शरीरातील हिमोग्लोबिन (haemoglobin) वाढण्यास मदत होते. शरीरामध्ये हिमोग्लोबिन कमी असेल तर तज्ञ पालक खाण्याचा सल्ला देखील देतात. पालकची भाजी तसेच भजी किंवा इतर पदार्थ तुम्ही खाल्ले असतील, पण पालकच्या सूपबद्दल लोकांना फारशी माहिती नाही. म्हणूनच पालक सूप कसं बनवायचं हे आज आपण पाहणार आहोत.

पालक सूपसाठी लागणारं साहित्य-

पालक, मीठ, आले, कोथिंबीर, टोमॅटो, लिंबाचा रस, काळी मिरी, मलई.

पालक सूप कसं बनवायचे (how to make Spinach soup?)-

पालक सूप बनवण्यासाठी प्रथम पालक स्वच्छ करून घ्या. साफ केल्यानंतर कापून घ्या. आता एका भांड्यात पाणी गरम करून त्यात पालक, टोमॅटो आणि आले उकळून घ्या. उकळल्यानंतर मिक्सरमध्ये टाकून त्याची चांगली पेस्ट बनवा. आता दुसऱ्या भांड्यात दोन कप पाणी गरम करून त्यात ही तयार पेस्ट टाका आणि थोडा वेळ शिजवा. नंतर त्यासोबत इतर साहित्य टाकून एक ते दोन मिनिटे शिजवून घ्या आणि नंतर गॅस बंद करा. झाले तुमचं पालक सूप तयार. आता या पालक सूपवर मलई टाकून सर्व्ह करा.

पालकचे इतर फायदे-

शरीराला कार्य व्यवस्थित चालावं यासाठी विविध प्रकारच्या पोषक तत्वांची गरज असते. अशा परिस्थितीत पालक आरोग्यासाठी (Health) खूप फायदेशीर आहे. अँटीऑक्सिडंट्स आणि कॅन्सरविरोधी घटकांनी समृद्ध असलेली ही हिरवी भाजी आरोग्यासाठी उत्तम मानली जाते. पालक ही लोह , जीवनसत्त्वे (vitamin) आणि खनिजांनी (minerals)समृद्ध असलेली पालेभाजी आहे, जी खाण्याचा सल्ला डॉक्टर देतात. पालक खाण्याचा एक उत्तम फायदा म्हणजे त्यात कॅलरी आणि फॅट कमी असते. पालकामध्ये फायबरचे प्रमाण जास्त असल्याने ते अपचन (Indigestion) , बद्धकोष्ठता यासारख्या पचनाच्या समस्या टाळण्यास मदत करते. पालकामध्ये व्हिटॅमिन ए भरपूर प्रमाणात असते, ज्यामुळे तुमचे शरीर मजबूत होते. पालक खाल्ल्याने तुमची रोगप्रतिकारशक्तीही सुधारते.