माझी रेसिपी : कोथिंबिरीचे धिरडे

कोथिंबीर ही आपल्या रोजच्या वापरातील महत्त्वाची पालेभाजी (वनस्पती) आहे. त्यातल्या त्यात पालेभाज्यांमध्ये अत्यंत गुणी अशी कोथिंबीर ही एक भाजी आहे. तिचा विशिष्ट असा स्वाद जवळजवळ सगळ्याच पदार्थांची लज्जत वाढवतो. फक्त स्वादच नाही तर एखादा पदार्थ विशेष आकर्षक सजवण्यासाठीदेखील कोथिंबीर सगळ्या वनस्पतींमध्ये भाव खाऊन जाते. कोथिंबीर लोहयुक्त आहे. त्यामुळे रोजच्या स्वयंपाकात कोथिंबिरीचा सढळ वापर असावा. कोथिंबिरीचे धिरडे झटपट बनवून तयार होते आणि चवीला भन्नाट होते.

साहित्य : २ कप कोथिंबीर, १ कप ज्वारीचे पीठ, अर्धा कप बेसन, २ चमचे रवा, ८-१० लसूण पाकळ्या, ४-५ हिरव्या मिरच्या, पाव चमचा हळद, पाव चमचा ओवा, १ चमचा जिरे, १ चमचा लिंबाचा रस, मीठ.

कृती : सर्वप्रथम कोथिंबीर निवडून स्वच्छ धुऊन घ्यावी. मिक्सरच्या भांड्यामध्ये कोथिंबीर, जिरे, ओवा, हिरवी मिरची, लसूण घालून पेस्ट करून घ्यावी. एका बाउलमध्ये ज्वारी, बेसन, रवा घालून एकत्र मिसळून घ्यावे. यामध्ये कोथिंबिरीची पेस्ट घालावी. पाणी घालून सरबरीत पीठ करून घ्यावे. त्यामध्ये चवीपुरतं मीठ आणि लिंबाचा रस घालावा. तवा गरम करून त्यामध्ये पळीभर पीठ सोडून धिरडी करून घ्यावीत. चवीला अत्यंत रुचकर होतात ही धिरडी.

टिप : कोथिंबिरीऐवजी देठंपण वापरू शकता. लिंबाचा रस नसेल, तर चमचाभर दहीपण घालू शकता.

- मधुरा बाचल