कोरोनाचे सावट असूनही लाडक्या गणरायाची मंगलमय वातावरणात प्राणप्रतिष्ठा 

लोणावळा : सर्वांनाच उत्सुकता असलेल्या गणरायाचे गणपती बाप्पा मोरया च्या जयघोषात कोरोनाचे सावट असतानाही मंगलमय वातावरणात लोणावळा परिसरात गणेशाची प्राणप्रतिष्ठा करण्यात आली. कोरोनाचा प्रादुर्भाव सध्या वेगाने होत आहे. संसर्ग रोखण्यासाठी सर्वांचा लाडका व मांगल्याचे प्रतीक असलेला गणेशोत्सव सध्या साध्या पद्धतीने साजरा करण्यात येत आहे. सार्वजनिक मंडळामध्ये सध्या निरुत्साह असला तरी गणेशोत्सवात घरगुती आरास व देखावे सजावटीसाठी नागरिकांची लगबग सुरू आहे.

ताज्या बातम्यांसाठी डाऊनलोड करा ई-सकाळचे ऍप 

गणेशाची मुर्ती भक्तीमय वातावरणात घरी नेण्यासाठी दुकानामध्ये शनिवारी पहाटेपासूनच भाविकांनी गर्दी केली होत. शुक्रवार आणि शनिवारी लोणावळा शहरातील बाजारपेठ गर्दीने फुलून गेली होती. यादरम्यान बाजारपेठेत नागरिकांनी मोठी गर्दी केल्याने सोशल डिस्टन्सिंगचा मात्र फज्जा उडाला. आराशीच्या वस्तू, फराळ तसेच मिठाई खरेदीसाठी नागरिकांनी रांगा लावल्याचे चित्र होते. प्रामुख्याने गणपतीसाठी आकर्षक मखरे, सजावटीचे साहित्य, फळे, फुले-हार विक्रेत्याकडे प्रचंड गर्दी केली होती. शहरातील मिठाईच्या दुकानांमध्येही फराळाचे साहित्य खरेदीसाठी भाविकांची गर्दी होत आहे. यात बालगोपाळांचा उत्साह ओसंडून वाहत होता. खरेदीसाठी नागरिक मोठ्या प्रमाणावर बाहेर पडल्याने लोणावळ्यातील शिवाजी पुतळा ते नगरपालिका रुग्णालयादरम्यान जत्रेचे स्वरूप आले होते.

Video : प्राण-प्रतिष्ठापना |गणेश पूजन । गणेशोत्सव २०२०

सामाजिक उपक्रमांवर भर

कोरोनाचा धोका असल्याने संसर्ग रोखण्यासाठी सार्वजनिक मंडळे पुढे सरसावली आहेत. मंडळांच्या वतीने यंदा मोठ्या प्रमाणावर खर्च टाळत सामाजिक उपक्रमावर भर देण्यात आला असून साध्या पद्धतीने गणेशोत्सव साजरा करण्यात येत आहे. काही मंडळांनी कार्यकर्त्यांनी उत्साहात गणेशाची प्राणप्रतिष्ठा केली.