काबूलमध्ये लग्न समारंभात आत्मघाती स्फोट; 40 जणांचा मृत्यू

काबूल : अफगाणिस्तानची राजधानी काबूलमध्ये शनिवारी रात्री झालेल्या  आत्मघाती बॉम्बस्फोटात 40 जणांचा मृत्यू झाला असून, 100 हून अधिक जण जखमी असल्याचे वृत्त आहे.

अफगाणिस्तानच्या गृहमंत्रालयाचे प्रवक्ते नुसरत राहिमी यांनी दिलेल्या माहितीनुसार, शनिवारी काबुल शहरात हा स्फोट घडवून आणण्यात आला. लग्नसमारंभात हा स्फोट झाला असून, आतापर्यंत 40 जणांचा मृत्यू झाला आहे. तर, 100 हून अधिक जण जखमी आहेत. त्यांना स्थानिक रुग्णालयात दाखल करण्यात आले आहे. 

काबूलमधील पश्चिमेकडील शहरात हा बॉम्बस्फोट घडवण्यात आला. यावेळी हॉलमध्ये लग्न समारंभासाठी एक हजारहून अधिक लोक उपस्थित होते. शनिवारी रात्री साडेदहाच्या सुमारास हा स्फोट झाला. अद्याप या हल्ल्याची जबाबदारी कोणत्याही दहशतवादी संघटनेने स्वीकारलेली नाही.