जपान भूकंपाने हादरलं, त्सुनामीचा इशारा; पाहा VIDEO

टोकियो - जपानमध्ये शनिवारी 7.2 रिश्टर स्केल भूकंपाचा धक्का बसला. या भूकंपनानंतर त्सुनामीचा इशारा देण्यात आला आहे. जपानच्या उत्तर पूर्व किनारपट्टीच्या भागात भूकंपाचे धक्के बसले. जपानने दहा वर्षांपूर्वी भीषण भूकंप आणि त्सुनामी अनुभवली होती. नुकतंच 11 मार्चला या कटू आठवणींना दहा वर्षे झाली. जपानच्या वेधशाळेनं शनिवारी त्सुनामीचा इशारा दिला आहे. जपानच्या स्थानिक वेळेनुसार सायंकाळी 6 वाजून 9 मिनिटांनी मायागी प्रांतात भूकंप झाला. जमिनीपासून 60 किमी आत हा भूकंप होता. स्थानिक माध्यमांनी दिलेल्या वृत्तानुसार अजुनतरी या भूकंपामुळे काही नुकसान झाल्याचं समोर आलेलं नाही.

समुद्र किनाऱ्या लगत असलेल्या मियागी प्रांतात शनिवारी 7.2 रिश्टर स्केल तीव्रतेच्या भूकंपाने जपान हादरलं. यानंतर समुद्रात जवळपास एक मीटर उंचीच्या लाटाही उसळल्या. मियागीमध्ये जपानचा एक न्यूक्लिअर पॉवर प्लांट आहे. भूकंपानंतर प्लांट सुरक्षित असल्याचं सांगण्यात येत आहे. भूकंपनांतर जवळपासच्या 200 घरांमधील वीज गेली आहे. 

पूर्व जपानच्या रेल्वे कंपनीने भूकंपानंतर बुलेट ट्रेनची सेवा थांबवली आहे. भूकंपानंतर खबरदारी म्हणून टोहोकू शिंकानसेन बुलेट ट्रेन तात्पुरत्या काळासाठी निलंबित करण्यात आली आहे. आता जपानमधील भूकंप होत असताना त्यावेळचे काही व्हिडीओ सोशल मीडियावर व्हायरल होत आहेत. 

जगातील भूकंप प्रवण देशांपैकी एक जपान हा देश आहे. याठिकाणी सातत्यानं भूकंपाचे धक्के बसत असतात. पृथ्वीच्या टेक्टोनिक प्लेट्सची सीमा तयार करणाऱ्या रिंग ऑफ फायरवर हा देश असून भूकंपाच्या दृष्टीने संवेदनशील मानला जातो.