Istanbul nightclub: इस्तांबूलमध्ये अग्नितांडव! नाईटक्लबच्या नूतनीकरणावेळी लागलेल्या आगीत 29 जणांचा मृत्यू

इस्तांबूल- तुर्कीमध्ये एक मोठी दुर्घटना घडली आहे. इस्तांबूलमधील एका नाईटक्लबमध्ये नूतनीकरणाचे काम सुरु होते. यावेळी लागलेल्या आगीत कमीतकमी २९ लोकांचा मृत्यू झाला आहे. आठ लोक जखमी झाले असून यातील सात लोकांची स्थिती बिकट असल्याचं सांगण्यात येतंय. सीएनएन या वृत्तसंस्थेने यासंदर्भातील वृत्त दिलं आहे. (fire at a nightclub undergoing repairs in Istanbul Turkey state media reports many died)

गव्हर्नर ऑफिसने दिलेल्या माहितीनुसार, सेंट्रल इस्तांबूलच्या बेसिक्टस जिल्ह्यातील ही घटना आहे. हा प्रदेश यूरोपच्या बाजूला येतो. सर्व पीडित हे नाईटक्लबमध्ये काम करणारे मजूर असल्याचं कळतंय. आगीची माहिती मिळताच अग्निशमन दल घटनास्थळी पोहोचले होते. यासंदर्भातील एक व्हिडिओ समोर आला आहे.

आगीची घटना घडली तेव्हा नाईटक्लबच्या नूतनीकरणाचे काम सुरु होते. याप्रकरणी पाच जणांविरोधात अटक वॉरंट जारी करण्यात आला आहे. यामध्ये नाईटक्लबचे तीन मॅनेजर आणि नूतनीकरणासाठी कारणीभूत असलेल्या एका व्यक्तीचा समावेश आहे. तुर्कीचे न्याय मंत्री Yilmaz Tunc यांनी एक्सवर पोस्ट करत यासंदर्भातील माहिती दिली आहे.

स्थानिक मीडियानुसार, घटनास्थळाची पाहणी, आगीच्या कारणांचा तपास सुरु आहे. तीन तज्ज्ञ टीम घटनास्थळी पोहोचल्या आहेत. आग ज्याठिकाणी लागली ती जागा अंडरग्राऊंड होती असं कळतंय. त्यामुळे अनेकांना लवकर बाहेर पडता आले नाही. आगीचे कारण अद्याप समजू शकलेलं नाही. (Latest Marathi News)