निवडणूक न झाल्यास यादवी : इम्रान खान

इस्लामाबाद : मुदतपूर्व निवडणूक जाहीर झाली नाही तर देशात यादवी संघर्ष उसळेल, असा इशारा पाकिस्तानचे पदच्युत पंतप्रधान इम्रान खान यांनी दिला आहे.सत्ता गमावल्यापासून इम्रान यांच्या पाकिस्तान तेहरीक-ए-इन्साफ (पीटीआय) पक्षाने आंदोलन तसेच निषेध मोर्चांवर भर दिला आहे. आंदोलकांना संरक्षण मिळावे म्हणून सर्वोच्च न्यायालयात याचिका दाखल करण्यात आली आहे. त्यावर निकाल लागताच मोर्चाची पुढील तारीख जाहीर केली जाईल. गेल्या बुधवारी इम्रान यांनी इस्लामाबादच्या दिशेने मोर्चा नेला. त्यानंतर धरणे धरण्याचा इशारा त्यांनी दिला होता, मात्र अखेरच्या क्षणी त्यांनी पवित्रा बदलला.

सरकारने मुदतपूर्व निवडणुकांची तारीख सहा दिवसांत जाहीर करावी अन्यथा धरणे धरू, असा इशारा त्यांनी दिला. राष्ट्रीय असेंब्लीमध्ये परतण्याचा प्रश्नच नाही, कारण तसे केल्यास आपले सरकार हटविण्याच्या कट स्विकारल्यासारखे होईल, असेही इम्रान यांनी स्पष्ट केले. इम्रान यांना अविश्वास ठरावानंतर हटविण्यात आले. यामागे अमेरिकेचा हात असल्याचा आरोप त्यांनी केला आहे.

निवडणूक व्हाव्यात म्हणून आम्हाला कायदेशीर आणि घटनात्मक मार्गांचा अवलंब करू दिला जातो की नाही हे आपण पाहूया. अन्यथा हा देश यादवीच्या दिशेने जाईल.

- इम्रान खान, पीटीआयचे प्रमुख