इम्रानना हवी होती झरदारींची मदत

इस्लामाबाद - अडचणीत आलेली सत्ता वाचविण्यासाठी पाकिस्तानचे पदच्युत पंतप्रधान इम्रान खान यांनी पाकिस्तान पीपल्स पार्टीचे अध्यक्ष असिफ अली झरदारी यांच्याशीही संपर्क साधण्याचा प्रयत्न केला होता, असे एका ध्वनिफितीवरून उघडकीस आले आहे.

पाकिस्तानमध्ये सोशल मीडियावर असिफ अली झरदारी आणि रिअल इस्टेट क्षेत्रातील बडी आसामी असलेल्या मलिक रियाझ हुसेन यांच्यातील संभाषणाची ध्वनिफित व्हायरल झाली आहे. इम्रान खान यांना तुमच्याशी बोलणी करण्याची इच्छा आहे, ते मला सारखे मेसेज पाठवत आहेत, असे हुसेन हे झरदारी यांना सांगत असल्याचे या ध्वनिफितीत ऐकू येत आहे. हुसेन यांच्या बोलण्यावर झरदारी यांनीही ‘आता हे शक्य नाही,’ असे म्हटल्याचे ध्वनिफितीत आहे. ही ध्वनिफित बनावट असल्याचा दावा इम्रान खान यांच्या पाकिस्तान तेहरीके इन्साफ पक्षाने (पीटीआय) केला असला तरी झरदारी यांच्या समर्थकांनी मात्र तो खरा असल्याचे म्हटले आहे.

पाकला मदत मिळण्याची आशा

आर्थिक अडचणीत असलेल्या पाकिस्तानला आंतरराष्ट्रीय नाणेनिधीकडून मदत मिळण्याची आशा वाटत आहे. पाकिस्तानच्या अर्थव्यवस्थेला दिलासा म्हणून त्यांच्यावरील कर्ज काही प्रमाणात माफ करण्याचा प्रस्ताव पाकिस्तानने नाणेनिधीसमोर ठेवला असून तो पुढील महिन्यात मंजूर होण्याची शक्यता अर्थमंत्री मिफ्ता इस्माईल यांनी आज व्यक्त केली. पाकिस्तानला पुढील आर्थिक वर्षात ३६ ते ३७ अब्ज डॉलर मदतीची आवश्‍यकता असल्याचेही इस्माईल यांनी सांगितले.