इस्त्राइलकडून Iron Beam लेझर तंत्रज्ञानाची यशस्वी चाचणी; पाहा व्हिडीओ

जेरूसलेम : इस्त्राइलने जगातील पहिल्या क्षेपणास्त्र विरोधी लेजर सिस्टिमची यशस्वी चाचणी केली असून याबाबतची माहिती इस्त्राइलचे पंतप्रधान नफ्ताली बॅनेट यांनी ट्वीट करत दिली आहे. या सिस्टिमला 'आयर्न बीम लेझर इंस्पेक्शन' असं नाव देण्यात आलं असून यामुळे शत्रूच्या क्षेपणास्त्रांचा अचूक शोध घेऊन मारा करता येऊ शकतो.

ही जगातील पहिली उर्जा आधारित प्रणाली असून यामध्ये रॉकेट आणि क्षेपणास्त्र पाडण्यासाठी 'लेझर'चा वापर करण्यात येत आहे. यासंदर्भातील चाचणीचा व्हिडीओ पंतप्रधान नफ्ताली बॅनेट यांनी शेअर केला आहे. यामध्ये हे यंत्र क्षेपणास्त्र आणि रॉकेटवर अचूक मारा करत पाडत असल्याचं दिसत आहे. इस्त्राइलच्या संरक्षण संशोधन आणि विकास संचालनालयाने आयर्न बीम लेजर इंटरसेप्शन या सिस्टिमचा वापर करत या यंत्राची यशस्वी चाचणी केली आहे.

"आपल्याला ही गोष्ट ऐकायला सायन्स फिक्शन असल्यासारखी वाटेल पण हे खरं आहे." असं इस्त्राइलच्या पंतप्रधानांनी व्हिडीओ ट्वीट करत म्हटलंय. यातील एका शॉटसाठी (एकावेळी केला गेलेला मारा) फक्त ३.५० डॉलर इतका खर्च येतो. असंही त्यांनी केलेल्या ट्वीटमध्ये म्हटलंय.

दरम्यान संरक्षण क्षेत्रातील तज्ज्ञ या तंत्रज्ञानाला गेम चेंजर असल्याचं सांगत आहेत. तसेच या यंत्रणेला हाताळणं खूप सोपं असून मागच्या काही वर्षापासून या तंत्रज्ञानाच्या विकासासाठी प्रयत्न केले जात होते. राफेल हत्यार बनवणाऱ्या कंपनीच्या तंत्रज्ञानाच्या साथीने हे तंत्रज्ञान विकसित केलं आहे.

दरम्यान हे यंत्र कमी प्रकाशात यशस्वी काम करत नसल्याचं सांगितलंय. ढगाळ आणि खराब वातावरणात या यंत्रणेला हाताळता येत नाही. दरम्यान या यंत्रणेला लढाऊ विमानावर बसवण्याची तयारी चालू आहे. जेणेकरुन ढगांच्या वरुन सीमेवर लक्ष ठेवता येणार आहे. यासाठी सध्या प्रयत्न केले जात असल्याचं इस्त्राइलच्या संरक्षण मंत्रालयाकडून सांगण्यात आलं आहे.