युक्रेनचे स्वातंत्र्य धोक्यात : पुतीन

लव्हिव : पाश्‍चिमात्य देशांनी रशियावर घातलेले निर्बंध म्हणजे आमच्या विरोधात युद्ध पुकारण्यासारखेच आहे. यामुळेच युक्रेनचे स्वातंत्र्य धोक्यात आले, असा इशारा रशियाचे अध्यक्ष व्लादीमिर पुतीन यांनी दिला. मॉरिपोल शहरामध्ये जाहीर केलेली शस्त्रसंधी युक्रेनच्या सैन्याच्या गोळीबारामुळे भंग झाल्याचा दावाही त्यांनी केला.

रशियाने आक्रमणाचा जोर कायम ठेवत सर्व दोष पाश्‍चिमात्य देश आणि युक्रेनला देण्याचे आपले धोरण कायम ठेवले आहे. ‘आम्हाला विरोध करणे निष्फळ आहे. इतरांचे ऐकून विरोध सुरु केल्यानेच युक्रेनची हानी होत आहे. त्यांनी असा विरोध कायम ठेवल्यास त्यांचे स्वातंत्र्य धोक्यात आहे. असे खरोखरच घडले, तर त्याची जबाबदारीही युक्रेनवरच असेल. पाश्‍चिमात्य देशांनीही रशियावर अनेक निर्बंध जाहीर केले आहेत.

हे युद्ध पुकारण्यासारखेच आहे,’ असे पुतीन म्हणाले. पुतीन यांनी आज व्हिडिओ संदेशाद्वारे हवाई दलाशी संवाद साधला. रशियाने मॉरिपोलला वेढा घातला. रशियाच्या बाँबवर्षावामुळे शहरातील नागरिकांना बाहेर पडता आले नाही. शस्त्रसंधी जाहीर करण्यात आली होती, मात्र युक्रेनने आमचे प्रयत्न निष्फळ ठरविले, असा आरोप पुतीन यांनीच युक्रेनवर केला आहे.