Pakistan : पाकिस्तानच्या तुरुंगात जीव गमावलेल्या सरबजीत सिंगच्या पत्नीचा अपघातात मृत्यू

2013 मध्ये पाकिस्तानच्या तुरुंगात (Pakistan Jail) जीव गमावलेला भारतीय नागरिक सरबजीत सिंगच्या (Sarabjit Singh) पत्नीचा सोमवारी मृत्यू झाला. पोलिसांनी दिलेल्या माहितीनुसार, सुखप्रीत (Sukhpreet Kaur) या दुचाकीवरून जात असताना फतेहपूरनजीक अचानक तोल जाऊन कोसळल्या. त्यांना त्वरित रग्णालयात दाखल करण्यात आलं. पण, तिथं त्यांचं निधन झालं.

सुखप्रीत यांच्यावर तरणतारण येथील भिखीविंद इथं आज अंत्यसंस्कार होणार आहेत. त्यांच्या पश्चात पूनम आणि स्वप्नदीप कौर अशा दोन मुली आहेत. तर, सरबजीत सिंग यांची बहीण दलबीर कौर यांचं छातीत दुखण्याच्या तक्रारीनंतर जूनमध्ये निधन झालं होतं. दलबीर कौरनं आपला भाऊ सरबजीत सिंगला पाकिस्तानच्या तुरुंगातून सोडवण्यासाठी दीर्घ लढा दिला. सरबजीत सिंगचा (49) एप्रिल 2013 मध्ये लाहोर तुरुंगातील कैद्यांनी केलेल्या हल्ल्यात मृत्यू झाला होता.

दहशतवादी आणि हेरगिरीच्या कारवायांमध्ये कथित सहभागासाठी त्याला पाकिस्तानी न्यायालयानं (Pakistan Court) दोषी ठरवलं आणि 1991 मध्ये त्याला फाशीची शिक्षा सुनावली. तथापि, 2008 मध्ये पाकिस्तान सरकारनं (Pakistan Government) त्याच्या फाशीला अनिश्चित काळासाठी स्थगिती दिली होती.