ब्रिटनचे पंतप्रधान बोरिस जॉन्सन राजीनामा देण्यास तयार!

लंडन : ब्रिटनचे पंतप्रधान बोरिस जॉन्सन हे आजच (गुरुवार) आपल्या पदाचा राजीनामा देण्याची शक्यता वर्तवली जात आहे. अनेक आंतरराष्ट्रीय माध्यमांनी याबाबत वृत्त दिलं आहे. जॉन्सन यांच्या मंत्रिमंडळातील अनेक मंत्र्यांनी राजीनामे दिले आहेत. त्यामुळं आता जॉन्सन यांच्यावरही राजीनामा देण्याची वेळ आली आहे.

बोरिस जॉन्सन यांच्या मंत्रिमंडळातील ४० मंत्र्यांनी कालच आपल्या पदाचे राजीनामे दिले आहेत. तसेच या मंत्र्यांनी राजीनामे देताना पंतप्रधान जॉन्सन यांनाही राजीनामा देण्यास सांगितलं होतं. त्यावर आता जॉन्सन हे राजीनामा देण्यास तयार झाले आहेत. पण ते तातडीनं राजीनामा देणार नाहीत, ते आपल्या कार्यालयाचा कार्यभार तोपर्यंत सोडणार नाहीत जोपर्यंत त्यांची कन्झर्वेटिव्ह पार्टी नव्या नेत्याची निवड करत नाही. जो नेता जॉन्सन यांची पंतप्रधानपदाची जागा घेईल.

मंत्र्यांनी का दिले राजीनामे?

गेल्या ४८ तासात जॉन्सन यांच्या मंत्रिमडळातील ५० हून अधिक मंत्र्यांनी राजीनामे दिले आहेत. त्यांनी राजीनामे देताना म्हटलंय की, अनेक घोटाळ्यांमध्ये नाव आल्यानं जॉन्सन हे पंतप्रधानपदावर राहण्यास लायक नाहीत. अशा प्रकारे जॉन्सन यांच्या कन्झर्वेटिव्ह पार्टीमध्ये उघडपणे बंड पुकारण्यात आलं आहे.