पूर्वजन्मांचा शोध

सद्‌गुरू : पूर्वजन्मांचा शोध घेण्याचा काही मार्ग आहे का? मला माहीत आहे, की पूर्वजन्मांचा शोध घेण्याबाबतीत अतिशय मूर्खपणाच्या अनेक गोष्टी लिहिल्या गेल्या आहेत. त्या फक्त विचित्र मानसिक कसरती आहेत.

तुम्हाला खरोखर भूतकाळातील काही पाहायचे असेल, तर स्वतःला जागृतीच्या खूप उच्च पातळीवर नेता आले पाहिजे, जिथे ती स्मृतीच्या धाग्यांना भेदून निघेल; पण त्याचा काय उपयोग? सध्या, तुम्ही या जीवनात जे घडत आहे, त्याची स्मृती हाताळू शकत नाही. दहा वर्षांपूर्वी घडलेल्या गोष्टीने तुम्ही त्रासून जाता. तुम्ही अशा स्थितीत असताना, जर तुम्हाला दहा जन्मांपूर्वीचे आठवले, तर त्याने तुम्हाला वेड लागेल.

स्मृतीचा संदर्भ घेतला तर, ज्याला तुम्ही पूर्वजन्म म्हणता ते फक्त मनाचे अबोध स्तर आहेत. तुम्ही स्वतःला जागरूकतेच्या उच्च पातळीवर नेले, तर मनाचे हे अबोध स्तर, जे तुम्हाला आतून नियंत्रित करत आहेत, ते तोडले जाऊ शकतात आणि विलीन केले जाऊ शकतात.

मनाच्या अबोध स्तरांमध्ये, अनेक आयाम आहेत जिथे तुमची पोहोच नाही; पण ते तुम्ही करत असलेल्या प्रत्येक गोष्टीवर प्रभाव टाकतात. म्हणून तुम्ही अशा प्रक्रियेतून गेलात, की जिथे जागरूकतेच्या उच्च पातळीमुळे, तुम्ही मनाचे अबोध स्तर जाणीवेच्या अवस्थेत आणता - स्मृतीच्या संदर्भात नाही, तर ऊर्जा आणि अनुभवाच्या संदर्भात - तुम्ही या गोष्टी सोडवू शकता आणि आतून स्वतःला मोठ्या प्रमाणात पूर्णपणे मुक्त ठेवू शकता.

या संदर्भात पूर्वजन्माचा संबंध आहे, पण स्मृतीच्या दृष्टीने काही आठवणे कोणत्याही प्रकारे परिणामकारक नाही. ते फक्त तुमचे आयुष्य गुंतागुंतीचे करून अस्ताव्यस्त करेल.

समजा तुम्ही जाणले, की तुमच्या शेजाऱ्याचा कुत्रा तुमच्या मागच्या जन्मात तुमचा पती होता. मग तुम्ही तुमच्या शेजाऱ्याच्या कुत्र्यावर दगड फेकायला सुरवात कराल किंवा कदाचित, त्याचा मुका घ्याल. दोन्ही प्रकारे, ते धोकादायक आहे. म्हणून ते तुमच्यासाठी सुरक्षित नाही.

तुमच्यासाठी ते आवश्यकसुद्धा नाही. पण वेगळ्या पातळीवर जर तुम्ही स्मृतीच्या प्रक्रियेतून न जाता, ते तुमच्या अनुभवात आणू शकलात, तर एका प्रकारे स्वतःला मुक्त करण्याचा तो एक मार्ग बनतो.