Belly Fat Loss तिशीनंतर पोटावरची चरबी वाढतेय? नियमित करा 3 व्यायाम, शरीर होईल सडपातळ

Exercises For Belly Fat : वयाच्या तिशीनंतर आपल्या शरीराचे स्नायू कमकुवत होऊ लागतात, यामुळे शरीराची ताकद देखील कमी होऊ शकते. परिणामी शरीराच्या मध्यभागी म्हणजेच कंबर, पोटावर अतिरिक्त चरबी वाढू लागते,  अशी माहिती एका संशोधनामध्ये आढळून आली आहे.  

धकाधकीचे लाइफस्टाइल, घर तसंच ऑफिसच्या कामाची जबाबदारी यामुळे अनेकांना स्वतःच्या आरोग्याची काळजी घेण्यासाठी तारेवरची कसरत करावी लागते. पण लठ्ठपणाची समस्या दूर करायची असेल तर आजपासून आपल्या वर्कआउट रूटीनमध्ये या तीन व्यायामांचा समावेश करावा. 

यामुळे तुमच्या पोटावरील अतिरिक्त चरबी कमी होण्यास नक्कीच मदत मिळेल. महिलावर्गासाठी हे व्यायामप्रकार खूपच फायदेशीर ठरू शकतात. 

पोटावरील चरबी दूर करण्यासाठी फ्लोअर एक्सरसाइज

झेड प्रेस

झेड प्रेस हा एक फ्लोअर एक्सरसाइज आहे, ज्यामुळे तुमच्या पोटाचे, खांद्याचे, पाठीचे स्नायू मजबूत होण्यास मदत मिळू शकते. हा व्यायाम करण्यासाठी जमिनीवर बसा, दोन्ही पाय समोरील बाजूस सोडा व पाठ-मान ताठ ठेवा.

आता दोन्ही हातांमध्ये डंबल घ्या आणि हात वरील बाजूस  न्यावे. आता दोन्ही हात सरळ करा आणि हळूहळू हातातील डंबल खांद्यापर्यंत आणा. हा व्यायाम दहा वेळा करावा.  

सुपरमॅन (Superman)

योग मॅटवर पोटाच्या बाजूने झोपावे. आता दीर्घ श्वास घ्या आणि दोन्ही पाय, हात, छातीचा भाग, मांड्या वरील बाजूने उचला आणि होल्ड करा. आता हळूहळू आपले हात, पाय आणि हनुवटी जमिनीवर ठेवा व रिलॅक्स व्हा. हा व्यायाम आपण आपल्या क्षमतेनुसार करावा. 

पुशअप (Pushup)

पुश-अप हा एक पारंपरिक व्यायाम आहे, ज्याच्या सरावाने तुमच्या पोटाचे, छातीचे आणि खांद्यांचे स्नायू मजबूत होऊ शकतात. प्लँक पोझिशनमध्ये या व पाठ- कंबर कुठेही न वाकवता आपले कमरेपासून वरील शरीर लयबद्ध पद्धतीने खाली-वर करावे.

हा व्यायाम देखील आपण आपल्या क्षमतेनुसार करावा. महत्त्वाचे म्हणजे तज्ज्ञांच्या मार्गदर्शनाखालीच हा व्यायाम करावा.  अन्यथा शारीरिक दुखापत होण्याची शक्यता असते.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.