साप्ताहिक राशिभविष्य : (१२ जानेवारी २०२५ ते १८ जानेवारी २०२५)

नोकरीमधील संकट जाईल

मेष : सप्ताहातील मकर संक्रमण वक्री मंगळाच्या अधिपत्याखाली होईल. सप्ताहात अश्विनी नक्षत्राच्या व्यक्तींना विशिष्ट मानवी उपद्रव होऊ शकतो. ता. १४ ते १६ हे दिवस जनसंपर्कातून सांभाळण्याचे आहेत. बाकी सप्ताहाचा आरंभ कलाकारांना यश-प्रसिद्धी देणारा ठरावा. उद्याचा सोमवार भरणी नक्षत्राच्या व्यक्तींना व्यावसायिक उत्सव समारंभातून लाभदायक ठरण्याची शक्यता. घरात मौल्यवान वस्तूंची खरेदी होईल. नोकरीत वरिष्ठांकडून उत्तम प्रतिसाद मिळेल. नोकरीमधील संकट जाईल. कृत्तिका नक्षत्राच्या तरुणांना पौर्णिमेचे प्रभावक्षेत्र शैक्षणिक चिंता घालवणारे ठरेल.

तरुणांना नोकरीच्या संधी येतील

वृषभ : पौर्णिमेजवळ मृग नक्षत्राच्या व्यक्तींनी प्रवासात काळजी घ्यावी. सहवासातील स्त्री वर्गाशी वाद शक्यतो नकोतच. बाकी सप्ताहाचा शेवट स्वतंत्र व्यावसायिकांना तेजीचा राहील. रोहिणी नक्षत्राच्या व्यक्तींना संकष्टीचा शुक्रवार वैयक्तिक सुवार्तांनी चंद्रोदय करणारा ठरेल. काहींना विशिष्ट मानसन्मान चकित करतील. सप्ताहाची सुरुवात तरुणांना नोकरीविषयक संधी देईल. कृत्तिका नक्षत्राच्या व्यक्तींनी मकर संक्रांतीच्या प्रभावात चोरी, नुकसानीपासून काळजी घ्यावी. पोलिसांशी वाद-विवाद नकोत, कायद्याचे कसोशीने पालन करावे.

छंद व कलेची साथ मिळेल

मिथुन : सप्ताहातील वक्री मंगळाचे भ्रमण मकर संक्रांतीच्या प्रभावात दखल घेण्याचे. आरोग्यविषयक पथ्ये पाळा. बाकी सप्ताहाचा आरंभ आणि शेवट छानच राहील. पुनर्वसु नक्षत्राच्या व्यक्तींना पौर्णिमा वैयक्तिक कला वा छंद आदी उपक्रमांतून उत्तम साथ देईल. तरुणांना उत्तम विवाहस्थळे येतील. आर्द्रा नक्षत्राच्या व्यक्तींना सप्ताहात संमिश्र ग्रहमान राहील. संशयास्पद, आर्थिक व्यवहार टाळा. बाकी सप्ताहातील पौर्णिमेचे फिल्ड घर प्रसन्न ठेवेल. पती वा पत्नीचा भाग्योदयाचा कालखंड. नवपरिणितांना मोठा दिलासा मिळेल.

सरकारी कामांमध्ये यश

कर्क : पौर्णिमेला धरून होणारे वक्री मंगळाचे भ्रमण सतत प्रसंगावधान राखण्याचे. आश्लेषा नक्षत्राच्या व्यक्तींनी घरी वा दारी क्रोध आवरावा. बाकी पुष्य नक्षत्राच्या व्यक्तींना वक्री मंगळाच्या झळा विचित्र दुखापतीतून हैराण करू शकतात. स्वतंत्र व्यावसायिकांना पौर्णिमा वास्तुविषयक व्यवहारांतून लाभ करून देईल. शुक्रवारची संकष्टी घरातील वातावरण सुवार्तातून प्रसन्न ठेवेल. आश्लेषा नक्षत्राच्या व्यक्तींना सप्ताहाचा शेवट सरकारी कामांतून यश देणारा. जुन्या गुंतवणुकी फलद्रूप होतील. पुनर्वसु नक्षत्राच्या व्यक्तींना शेअर बाजारात प्राप्तीची शक्यता.

व्यवसायामध्ये यश लाभेल

सिंह : सप्ताहाचा आरंभ सुवार्तांच्या पार्श्वभूमीवर होईलच. पौर्णिमेच्या प्रभावातील उद्याचा सोमवार नोकरी, व्यावसायिक पार्श्वभूमीवर भाग्यसूचकच राहील. मात्र मघा नक्षत्राच्या व्यक्तींनी मकर संक्रांतीची पौर्णिमा सूर्योदयी जपण्याची. प्रवासात सांभाळा. पूर्वा नक्षत्राच्या व्यक्तींना सप्ताहाचा आरंभ आणि शेवट पूर्णपणे शुभग्रहांच्या लॉबीतूनच परिणामकारक ठरेल. व्यावसायिक आडाखे यशस्वी ठरतील. तरुणवर्गास उत्तम नोकरीच्या संधी मिळतील. उत्तरा नक्षत्राच्या व्यक्तींना मोठ्या प्रसिद्धीचे योग आहेत. प्रेमविवाहात प्रगती, काहींचे विवाह ठरतील. काहींचे परदेशी मोठे भाग्योदय आहेत तर काहींना ग्रीनकार्ड मिळेल.

वादग्रस्त वसुली होईल

कन्या : सप्ताहारंभी पौर्णिमेच्या प्रभावात होतकरू तरुणांचे प्रश्न सुटतील. नोकरीच्या छान मुलाखती होतील. उत्तरा नक्षत्राचे वास्तुविषयक प्रश्न मार्गी लागतील. विशिष्ट वादग्रस्त व्यावसायिक वसुली होईल. चित्रा नक्षत्राच्या व्यक्तींना न्यायालयीन प्रकरणांतून मोठा नैतिक विजय प्राप्त होईल. आजचा रविवार महत्त्वाच्या गाठीभेटीतून साध्य होणारा. सप्ताहाचा शेवट हस्त नक्षत्राच्या व्यक्तींना सुवार्तांची पार्श्वभूमी ठेवेल. घरात प्रिय व्यक्तींची कार्ये ठरतील. प्रवासातील कामे होतील. हस्त नक्षत्राच्या व्यक्तींना शाकंभरी पौर्णिमा भक्तिरसात डुंबवेल. काहींना तीर्थाटन घडेल.

जुन्या गुंतवणुकीतून फायदा होईल

तूळ : आपल्या राशीस एकूणच पौर्णिमेला धरून मकर संक्रांतीचे पर्व राहील. स्वाती नक्षत्राच्या व्यक्तींना सप्ताहाचा आरंभ भावरम्य राहील. विशिष्ट मनीषा पूर्ण होईल. नोकरीतील पर्यावरण सुधारेल. सप्ताहात पुत्रपौत्रांचे भाग्योदय होतील. त्यांचे वास्तूचे स्वप्न साकारेल. ता. १४ व १५ हे दिवस विशाखा नक्षत्राच्या व्यक्तींना जुन्या गुंतवणुकीतून फलदायी ठरतील. वारसा हक्काचे विशिष्ट स्वरूपाचे प्रश्न सुटतील. चित्रा नक्षत्राच्या व्यक्तींना पौर्णिमेचे प्रभावक्षेत्र संमिश्र स्वरूपाचे. सार्वजनिक जीवन सांभाळा. गैरसमज टाळा. तरुणांनी संक्रांतीच्या प्रभावात वाहने चालवताना सांभाळा.

कल्पनांना वाव मिळेल

वृश्चिक : यंदाची मकर संक्रांत पौर्णिमेच्या प्रभावात छान व्यावसायिक संक्रमण करेल. नवकल्पनांना वाव मिळेल. अनुराधा नक्षत्राच्या व्यक्तींना हे संक्रमण मोठा आत्मविश्वास देईल. ता. १४ व १५ हे दिवस भाग्यबीजे पेरणारे आहेत. तरुणांच्या आयुष्यात नोकरीतील बदलीतून एक छान पर्व सुरू होईल. ज्येष्ठा नक्षत्राच्या व्यक्तींना सप्ताहाचा शेवट संकष्टीच्या चंद्रोदयातून गुरुबळाची प्रचिती देणाराच ठरेल. शनिवारचा दिवस महत्त्वाच्या गाठीभेटीतून फलदायी होणारा ठरेल. अनपेक्षित गाठीभेटी होतील. मात्र सप्ताहात भावंडाशी वाद नकोत.

व्यावसायिकांना ऊर्जा लाभेल

धनु : मकर संक्रांतीच्या प्रभावात आरोग्यविषयक पथ्ये पाळा. अकारण वाद ओढवून घेऊ नका. बाकी सप्ताह स्वतंत्र व्यावसायिकांना उत्तम ऊर्जा देणारा. गाठीभेटीतून प्रभाव टाकाल. वास्तुविषयक व्यवहार पूर्ण होतील. सप्ताहाची सुरुवात तरुणांना नोकरीच्या मुलाखतींतून परिणाम साधणारा. मूळ नक्षत्राच्या व्यक्तींना संक्रमणाजवळ विचित्र खर्चाचे प्रसंग येऊ शकतात. पर्यटनस्थळी जपा. पूर्वाषाढा नक्षत्राच्या व्यक्तींना सप्ताहाचा आरंभ आणि शेवट मोठा यशदायीच. तरुणांचा परदेशी भाग्योदय. उत्तराषाढा नक्षत्राच्या व्यक्तींचा मानसन्मान होईल.

उलाढाल चांगली होईल

मकर : पौर्णिमेच्या प्रभावातील मकर संक्रमण वक्री मंगळाच्या प्रभावात होत आहे. विवेक जागृत ठेवा. प्रिय व्यक्तींची मन जपा. बाकी सप्ताहातील शुक्र, शनी सहयोग आणि गुरुभ्रमणाची स्पंदनं व्यावसायिक क्षेत्रात छान उलाढाली करतील. श्रवण नक्षत्राच्या व्यक्तींना नोकरीतील नव्या जडणघडणीतून लाभ. संक्रमण राजकीय व्यक्तींकडून लाभ करून देईल. धनिष्ठा नक्षत्राच्या व्यक्तींना वैवाहिक जीवनातील विशिष्ट सुवार्तातून धन्यता प्राप्त होईल. उत्तराषाढा नक्षत्राच्या व्यक्तीने सप्ताहाच्या शेवटी जुगार टाळावा.

कलाकारांना मोठा सूर गवसेल

कुंभ : सप्ताहात चंद्रबळातून विशिष्ट असे लाभ धक्काच देणार आहेत. उद्याचा शाकंभरी पौर्णिमेचा सोमवार मोठी फळे देईल. पूर्वा-भाद्रपदा नक्षत्राच्या व्यक्तींना शुभग्रहांचे पॅकेज पूर्णपणे साथ देईल. सप्ताहाचा आरंभ आणि शेवट एकूणच आपल्या राशीला मोठ्या सुवार्तातून फ्लॅश न्यूज मध्ये आणेल. नवपरिणितांना मोठा साथ देणारा सप्ताह राहील. शततारका नक्षत्राच्या व्यक्तींना शुक्रवारच्या संकष्टीचा चंद्रोदय मोठी कलात्मक अनुभूती देणारा. अर्थातच कलाकारांना मोठा सूर गवसेल. नवकल्पना सादर कराल. साडेसाती ही नवी जीवनदृष्टीही देत असते.

संतांचा सहवास लाभेल

मीन : अद्वितीय असे मकर संक्रमण होणार आहे. जीवनाचे खरे अध्यात्म कळेल. पौर्णिमेच्या प्रभावात होणारे मकर संक्रमण आपल्या बाबतीत ऐतिहासिकच राहील. त्याचा आत्मिक हृदयस्पर्शाने लाभ घ्यावाच. बाकी सप्ताहात नोकरी व्यावसायिक पर्यावरण चांगलेच सुधारेल. रेवती नक्षत्राच्या व्यक्तींना सप्ताहाची सुरुवात आणि मकर संक्रमण चंद्रबळातून अर्थातच आत्मिक धारणेतून उत्तम फळे देईल. विशिष्ट मानसिक ग्रह किंवा ग्रहणे निघून जातील. उत्तरा-भाद्रपदा नक्षत्राच्या व्यक्तींना संतांचा सहवास लाभेल, एखादा नवस फेडाल.