एकमेकांना शेण मारुन 'या' शहरात साजरा करतात एक विचित्र 'सण'

भारतातील महत्त्वाच्या सणांमध्ये 'दिवाळी' हा सर्वात खास सण मानला जातो. देशाच्या विविध राज्यांतील कर्नाटक आणि तामिळनाडूच्या सीमेवर असलेल्या गुमतापुरा गावात स्थानिक लोक दिवाळीची सांगता दरवर्षी एकमेकांना शेण मारुन (गोरहब्बा उत्सव) करतात.

या उत्सवात सहभागी होणारे गावातील लोक दुपारी गाय मालकांच्या घरी जाऊन शेण गोळा करतात. त्यानंतर हे शेण ट्रॅक्टरनं गावातील मंदिरात आणलं जातं.

मंदिराच्या पुजाऱ्याकडून शेणाची पूजा केली जाते आणि नंतर मोठ्या प्रमाणात गोळा केलेलं शेण मोकळ्या मैदानात ठेवलं जातं. यानंतर, पुरुष मोकळ्या मैदानात प्रवेश करतात आणि एकमेकांवर शेणाचे गोळे किंवा लाडू फेकण्यास सुरवात करतात.

दरवर्षी या उत्सवाचे साक्षीदार होण्यासाठी भारताच्या विविध भागातून लोक गुमतापुरा गावात येतात. असे म्हणतात की, शेणाची ही लढाई पाहिल्यानं आरोग्यास लाभ होतो.

स्थानिक शेतकरी महेश यांनी एएफपीच्या वृत्तात म्हटलंय, 'की जर कोणाला काही आजार असेल तर तो या महोत्सवात सहभागी होऊन बरा होऊ शकतो.'

कोविड-19 महामारी असूनही 2021 मध्ये 'गोरहब्बा उत्सव' साजरा करण्यात आला. यावेळी स्थानिक अधिकाऱ्यांनी कार्यक्रमाला परवानगी दिली आणि अल्पसंख्येनं लोक उत्साहानं यात सहभागी झाले.