पाहा, प्रत्येकाला सुखावणारी अक्कलकोटची धार्मिक व निसर्ग पर्यटनस्थळे

अक्कलकोट (सोलापूर) : अक्कलकोट तालुका (Akkalkot Taluka) हा तसा कायम दुष्काळी भाग आणि अर्थकारण दृढ करण्यासाठी सतत प्रयत्न करणारा आणि त्यातून बाहेर येण्यासाठी धडपड करणारा तालुका आहे. पण पर्यटन (Tourism) हे क्षेत्र असे आहे की त्यात तालुका हा बऱ्याच अंशी सदा भाविक व निसर्गप्रेमी नागरिकांनी बहरलेला असतो. अक्कलकोट तालुक्‍यातील सर्वांत महत्त्वाचे धार्मिक क्षेत्र श्री स्वामी समर्थ मंदिर (Shri Swami Samarth Temple) असून, त्याच्या जोडीलाच विश्व फाउंडेशनचे शिवपुरी (Shivpuri) तसेच श्री स्वामी समर्थ अन्नछत्र मंडळ (Shri Swami Samarth Annachhatra Mandal) आदी आहेत. श्री स्वामी समर्थ महाराजांच्या पवित्र वास्तव्याने अक्कलकोटला मोठे धार्मिक महत्त्व आहे. याचबरोबर अक्कलकोट येथील संस्थानकालीन इमारती व शस्त्रागार पर्यटकांना आकर्षित करणारे आहे. याचबरोबरच कुरनूर धरण (Kurnoor Dam) व गळोरगी तलाव (Galorgi Lake) आदी निसर्गरम्य ठिकाणे पाहण्यासारखी आहेत. येथे देश-विदेशातून आलेल्या शेकडो पक्ष्यांचे तसेच रंगीबेरंगी फुलपाखरांचे वास्तव्य सतत असते. अक्कलकोटच्या चारही बाजूला जाणारे रस्ते देखील आता राष्ट्रीय महामार्गाने जोडले गेले आहेत. यामुळे अक्कलकोट येथील धार्मिक व निसर्ग पर्यटन हे येथे येणाऱ्या प्रत्येकाला सुखावणारे ठरत आहे