Jalgaon News : जिल्ह्यातील प्राथमिक आरोग्य केंद्रासाठी नवीन १९ रूग्णवाहिका खरेदीस पालकमंत्री गुलाबराव पाटील यांनी मंजुरी दिली दिली. मागील महिन्यात ग्रामीण रूग्णालयांसाठी मंजूर केलेल्या ८ रूग्णवाहिका व आज प्राथमिक आरोग्य केंद्रासाठी मंजूर केलेल्या १९ रूग्णवाहिका अशा एकूण २७ रूग्णवाहिका जिल्ह्यात फेब्रुवारीपर्यंत दाखल होतील.
यामुळे जिल्ह्यातील आरोग्य व्यवस्था अधिक सक्षम होणार आहे, अशी माहिती जिल्हा आरोग्य अधिकारी डॉ.सचिन भायेकर यांनी दिली. (27 new ambulances will be introduced in district jalgaon news)
जिल्हा वार्षिक योजना २०२३-२४ (सर्वसाधारण) निधीच्या माध्यमातून रूग्णवाहिका खरेदी करण्यास पालकमंत्री पाटील यांनी परवानगी दिली आहे. लवकरच याबाबत तांत्रिक मंजुरीसाठी नाशिक उपसंचालकांकडे प्रस्ताव पाठविण्यात येऊन दोन दिवसांत मान्यता घेतली जाईल.
प्रशासकीय मंजुरी मिळाल्यानंतर निविदा प्रक्रिया राबविण्यात येऊन फेब्रुवारी २०२४ पर्यंत प्राथमिक आरोग्य केंद्रासाठी नवीन १९ अद्यावत रूग्णवाहिका खरेदी करण्यात येणार आहे. जिल्हा रूग्णालय व अधिनस्त ग्रामीण रूग्णालयांना ८ नवीन रूग्णवाहिका खरेदीस पालकमंत्री पाटील यांनी नोव्हेंबर २०२३ महिन्यात मंजुरी दिली होती.
जिल्हाधिकारी आयुष प्रसाद यांच्या पाठपुराव्यामुळे रूग्णवाहिका खरेदीच्या प्रस्तावास आरोग्य सेवा आयुक्तांनी एका दिवसातच तांत्रिक मान्यता दिली होती. या रूग्णवाहिकांची सध्या निविदा प्रक्रिया राबविण्यात येत आहे. जानेवारी २०२४पर्यंत या नवीन ८ रूग्णवाहिका ग्रामीण रूग्णालयात रूग्णसेवेत दाखल होणार आहेत, अशी माहिती जिल्हा शल्यचिकित्सक डॉ. किरण पाटील यांनी दिली.
पेशंट ट्रान्सपोर्ट ‘टाईप बी’ एसी रुग्णवाहिकांची खरेदी
जिल्हा वार्षिक योजना २०२३-२४ अंतर्गत जळगाव जिल्हा सामान्य रूग्णालय व त्यांच्या अधिनस्त ७ ग्रामीण रूग्णालयांमध्ये न्हावी (यावल), अमळगाव (अमळनेर), मेहुणबारे (चाळीसगाव), पिंपळगांव हरेश्वर (पाचोरा), बोदवड, एरंडोल, भडगाव या ८ रुग्णालयांसाठी प्रत्येकी १ अशा एकूण ८ पेशंट ट्रान्सपोर्ट टाईप बी एसी रुग्णवाहिका खरेदी करण्यात येणार आहेत.
या आरोग्य केंद्रांना मिळतील रूग्णवाहिका
जानवे (ता.अमळनेर), तामसवाडी (पारोळा), लोंढे, तरवाडे, खेडगाव (चाळीसगाव) वरखेडी, लोहटार (पाचोरा), कठोरा, वराडसिंम, पिंपळगाव (भुसावळ), अंतुर्ली (मुक्ताईनगर), भालोद, सावखेडा (यावल), नशिराबाद (जळगाव), भालोद (रावेर), गारखेडा, वाकडी (जामनेर), चांदसर, पाळधी (धरणगाव) अशा १९ नवीन रूग्णालयांना रुग्ण वाहिकांना मंजुरी दिली आहे.
"जिल्ह्यातील आरोग्य व्यवस्था बळकट करण्यासाठी जिल्हा नियोजनाच्या माध्यमातून वेळोवळी मदत करण्यात येते. नवीन रूग्णवाहिकांचा जिल्ह्यातील सर्वसामान्य रूग्णांना फायदा होणार आहे. भविष्यात ही जिल्ह्यातील आरोग्य व्यवस्था सक्षमीकरणासाठी सर्वतोपरी मदत करण्यास आम्ही कटिबद्ध आहोत." - गुलाबराव पाटील पालकमंत्री, जळगाव जिल्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.