Eknath Khadse : अजितदादांनीच 'हा' दावा फेटाळून लावलाय; काय म्हणाले एकनाथ खडसे?

जळगाव : अजित पवार भाजपात जाणार, पुन्हा एकदा राज्यात राजकीय भूकंप होणार या चर्चांना गेल्या काही दिवसांपासून उधाण आलं होतं. परंतु, या चर्चांना अजित पवारांनी (Ajit Pawar) मंगळवारी (18 एप्रिल) पूर्णविराम दिला.

असल्या कुठल्याही बातम्यांमध्ये तथ्य नसल्याचं अजित पवारांनी स्पष्ट केलं. यावर आता राष्ट्रवादी काँग्रेसचे नेते आमदार एकनाथ खडसे (Eknath Khadse) यांनी प्रतिक्रिया दिली आहे.

माध्यमांचं ज्याप्रमाणं माझ्यावर प्रेम आहे, त्याचप्रमाणं विरोधी पक्षनेते अजित पवार हेसुद्धा माध्यमांच्या आवडीचे आहेत. त्यामुळं ते दिसले नाहीत, की ‘नॉट रिचेबल’ असल्याचं सांगितलं जातं, त्यांच्या भाजप प्रवेशाची ‘मीडिया ट्रायल’ करण्यात आली, असं स्पष्ट मत आमदार खडसे यांनी व्यक्त केलं.

खडसे म्हणाले, 'अजित पवारांच्या भाजप प्रवेशात कुठलंही तथ्य नाही. स्वतः अजितदादांनीच हा दावा फेटाळून लावलाय. ‘जोपर्यंत माझ्यात जीवात जीव आहे, तोपर्यंत राष्ट्रवादीचे काम करत राहणार’, असं त्यांनी जाहीर केलंय. त्यामुळं हा विषय संपला आहे.' यावेळी खडसेंनी महागाईवर भाष्य केलं. शेतकरी अवकाळी आणि गारपिटीमुळं आर्थिक संकटात सापडला आहे. महागाई प्रचंड वाढली आहे. तर, दुसरीकडं बेरोजगारीचा प्रश्न गंभीर आहे. सरकार याकडं दुर्लक्ष करत असल्याचा आरोप त्यांनी केला.