Anandacha Shidha: गरिबांचा गुढीपाडवा गोड करणारा आनंदाचा शिधा पोचलाच नाही; शासनाच्या घोषणेचे काय?

जळगाव : राज्यातील शिंदे-फडणवीस सरकारने गुढीपाडव्यासाठी रेशनकार्डधारकांना आनंदाचा शिधा (रवा, साखर, तेल, हरभरादाळ) शंभर रुपयांत देण्याचे ठरविले होते. अवघ्या एक दिवसांवर गुढीपाडवा आला आहे.

सर्वसामान्यांना गुढीपाडव्यापूर्वी ‘आनंदाचा शिधा’ मिळेल, अशी आशा होती. मात्र, रेशन दुकानांवर अद्यापही आनंदाच्या शिधाचे किट पोचलेलेच नाहीत. यामुळे गरिबांचा गुढीपाडवा ‘कडू’ होण्याची चिन्हे आहेत.

गरिबांना मराठी नवीन वर्षाला महागाईची झळ नको, म्हणून राज्य शासनाने १०० रुपयांत ‘आनंदाचा शिधा’ गुढीपाडवा व भारतरत्न डॉ. बाबासाहेब आंबेडकर जयंतीनिमित्त देण्याची घोषणा मंत्रिमंडळाने केली होती.

राज्यातील एक कोटी ६३ लाख शिधापत्रिकाधारकांना याचा लाभ होणार आहे. गेल्या दिवाळीत ‘आनंदाचा शिधा’ देण्यात आला होता. काहींना दिवाळीत, तर काहींना दिवाळीनंतर ‘आनंदाचा शिधा’ मिळाला होता.

‘आनंदाचा शिधा’ पाकिटावर मुख्यमंत्री, उपमुख्यमंत्र्यांचे छायाचित्र नव्हते. यामुळे ती पाकिटे परत मागविली होती, तर काही ठिकाणी साखर, तेल न मिळताच शिधावाटप झाले होते. यामुळे ‘आनंदाचा शिधा’ चांगलाच गाजला होता.

आता परत गुढीपाडव्याला ‘आनंदाचा शिधा’ देण्याचा निर्णय राज्य शासनाने घेतल्याने रेशन कार्डधारकांमध्ये समाधानाचे वातावरण होते. अवघ्या एक दिवसावर गुढीपाडवा आला आहे. पाडव्यापूर्वी रेशन कार्डधारकांना शिधा देणे आवश्‍यक आहे.

मात्र, पुरवठा विभागाकडे अद्याप राज्य शासनाकडून ‘आनंदाचा शिधा’चे संच उपलब्ध झालेले नाहीत. ते आल्यानंतर प्रत्येक रेशन दुकानदारास कार्डच्या संख्येच्या प्रमाणात शिधा पोचविण्यात येणार आहे.

अंत्योदय व प्राधान्य कुटुंब कार्डधारकांना याचा लाभ मिळणार आहे. त्यानुसार प्राधान्य गटात चार लाख ९० हजार ६४०, अंत्योदय गटात एक लाख ३४ हजार ३५७ कार्डधारक, अशा एकूण सहा लाख २४ हजार ९९७ कार्डधारकांना ‘आनंदाचा शिधा’ मिळणार आहे.

''शासनाच्या निर्णयानुसार गुढीपाडवा व भारतरत्न डॉ. बाबासाहेब आंबेडकर जयंतीनिमित्त केवळ एकदाच ‘आनंदाचा शिधा’ किट रेशन कार्डावर मिळेल. पुरवठादारांकडून ‘आनंदाचा शिधा’ किट अद्याप आलेले नाहीत. ते दोन-तीन दिवसांत येतील, असे सांगण्यात आले आहे. आले की रेशन दुकानात पाठवू.'' -सुनील सूर्यवंशी, जिल्हा पुरवठा अधिकारी