BTची साडेपाच लाख पाकिटे बाजारात; यंदा कपाशीचा पेरा 20 टक्के वाढणार

जळगाव : जिल्ह्यात आजपासून बी. टी. बियाणांची विक्री होणार आहे. जिल्ह्यासाठी साडेपाच लाख बी. टी. बियाणे पाकिटे उपलब्ध करण्यात आली आहेत. यंदा कपाशीचा पेरा २० टक्के वाढणार असून, साडेपाच लाख हेक्टरपेक्षा अधिक हेक्टरवर कपाशीचा पेरा होणार असल्याची माहिती कृषी विभागाच्या अधिकाऱ्यांनी दिली.

गतवर्षी (२०२१) पाऊस चांगला होता. पेराही चांगला झाला. मात्र अतिवृष्टीने कपाशीचे मोठे नुकसान केले. यामुळे कपाशीचे उत्पन्न कमी झाले. मात्र दर नऊ ते तेरा हजार रुपये प्रतिक्विंटल मिळाला. यामुळे यंदाही कपाशीला चांगली मागणी असेल, यामुळे शेतकऱ्यांनी कपाशीचा पेरा अधिक लावण्याचा निर्णय घेतला आहे. गुलाबी बोंडअळीचा धोका कपाशीला होवू नये, यासाठी राज्य शासनाने एक जूनपासूनच बी. टी. बियाण्यांची विक्रीचे आदेश दिले होते. दरवर्षी बागायतदार शेतकरी मेतच कपाशी पेरतात. मात्र त्यावर बोंडअळी येते. ती इतरांच्या कपाशीलाही खराब करते. यामुळे उशिराने पेरा केल्यास बोंडअळीला पोषक वातावरण तयार होणार नाही. बोंडअळीच तयार होणार नसल्याने कपाशीचे बोंडअळीपासून होणारे नुकसान टळेल, या आशेने जून महिन्यातच बी. टी. ची विक्री व पेरणी करा अशा सूचना देण्यात आल्या होत्या.

१६ भरारी पथके

जिल्ह्यातील बियाणे खते व कीटकनाशके उत्पादन स्थळ, साठवणूक स्थळ तपासणी, जिल्ह्याबाहेरील व राज्याबाहेरील उत्पादकांचे साठवणूक स्थळ तपासणी मोहीम राबवण्यात येत आहे. यासाठी जिल्हास्तरावर एक व प्रत्येक तालुक्यात एक याप्रमाणे एकूण १६ भरारी पथकांची स्थापना करण्यात आली आहे.

''शेतकऱ्यांनी ‘एक गाव एक वाण’अंतर्गत एकजीनसी व स्वच्छ कापूस उत्पादन अभियानात सहभागी व्हावे. शेतकऱ्यांनी फसवणूक टाळण्यासाठी बियाणे खरेदीचे पक्के बील घ्यावे. बिल हंगाम संपेपर्यंत सांभाळून ठेवावे. एकाच पिकावर विसंबून न राहता मुख्य पिकाबरोबर आतंरपीक व मिस्त्रपिक घ्यावे. बियाण्यांची पेरणी करण्यापूर्वी बीजप्रक्रीया करुनच पेरणी करावी.'' - गुलाबराव पाटील, पालकमंत्री.

''जिल्ह्यात कपाशीचे क्षेत्र सर्वाधिक असले तरी यावर्षी मका पीकाचे क्षेत्र कमी होऊन सोयाबीन, तृणधान्य व गळीतधान्याचे क्षेत्र वाढणार आहे. जिल्ह्यात २७ लाख ५० हजार पाकिटे कपाशी बियाण्यांचे नियोजन आहे. जिल्ह्यात १ लाख ३३ हजार ४८२ मेट्रीक टन खतांचा साठा उपलब्ध आहेत. शेतकऱ्यांनी १०० मिलिमीटर पाऊस झाल्यानंतरच पेरण्या कराव्यात.'' - संभाजी ठाकूर, जिल्हा अधीक्षक कृषी अधिकारी.