पारोळा तालुक्यात जोरदार पाऊस! अंजनी नदीला पूर, शेतकऱ्यांमध्ये समाधान

पारोळा (जि. जळगाव) : गेल्या अनेक दिवसांपासून गायब झालेल्या पावसाने आज दुपारी चारच्या सुमारास शहरासह तालुक्यात जोरदार हजेरी लावली. टिटवी (ता. पारोळा) परिसरात झालेल्या मुसळधार पावसामुळे टिटवी तांडा रस्त्यावरील अंजनी नदीला पूर आला. ज्यामुळे ग्रामस्थांची एकच धावपळ उडाली. दरम्यान, आज झालेल्या पावसामुळे शेतकऱ्यांना कपाशीसह इतर पिकांची लागवड करता येणार असल्याने समाधान व्यक्त होत आहे.

पावसाळा सुरु झाल्यानंतर सर्वसाधारणपणे ७ जूनला पाऊस सुरु होतो. यंदा मात्र, पावसाने हुलकावणी दिल्यामुळे चिंतेचे वातावरण होते. आज दुपारी चारपासून पावसाला सुरवात झाली. टिटवी (ता. पारोळा) परिसरात पावसाचा जोर अधिक असल्याने तांडा रस्त्यावरील अंजनी नदीला पूर आला होता. सायंकाळच्या सुमारास शाला सुटल्यानंतर पुरामुळे विद्यार्थ्यांसह पालकही घाबरले होते. युवा सेनेचे उपतालुका प्रमुख समाधान मगर यांच्यासह गावातील काही तरुण तसेच शिक्षकांनी विद्यार्थ्यांना सुरक्षितपणे नदीच्या पलीकडे सोडले. दरम्यान, टिटवीसह तांडा परिसरात तसेच जवळच्या शिरसमणी, चोरवड, हनुमंतखेडा आदी भागात जोरदार पाऊस झाला. तालुक्यातील इतरही भागात पावसाने दमदार हजेरी लावल्यामुळे शेतकऱ्यांनी आनंद व्यक्त केल्याचे दिसून आले.

दरम्यान, शिरसमणी (ता. पारोळा) परिसरात गेल्या अनेक वर्षांपासून वीज तारा लोंबळकत आहेत. जमिनीपासून अवघ्या सहा ते सात फुटांवर या तारा आल्या असून त्या जीर्ण देखील झाल्या आहेत. सध्या पावसाळा असल्याने वीज तारा तुटण्याची भीती लक्षात घेता, त्या तातडीने उंच कराव्यात अशी मागणी समता परिषदेचे तालुकाध्यक्ष संतोष महाजन यांनी यांच्यासह ग्रामस्थांनी केली आहे.