जळगाव : गिरणा नदीपात्रात भर पावसात अवैध वाळूउपसा

जळगाव : शहरासह जिल्ह्यात एकीकडे पाऊस सुरू आहे, तर दुसरीकडे मात्र वाळूमाफिया वाळू चोरी करणे सोडत नसल्याचे चित्र बुधवारी (ता. १३) बांभोरी येथील तापी नदीपात्रात पाहावयास मिळाले. (Latest Marathi News)

सध्या वाळूउपसा बंद आहे. वाळूउपसा करणे चोरी आहे. महसूल विभागातर्फे अवैध वाळू उपसावर कारवाईही केली जाते. मात्र, बुधवारी सततच्या पावसाची संधी साधत वाळू चोरणाऱ्यांनी गिरणा नदीपात्रात थेट ट्रॅक्टर नेऊन वाळूउपसा केला.

जिल्ह्यात पावसामुळे नद्यांना पूर येऊ लागले आहेत. गिरणा नदीपात्रातही पाणी येत आहे. जिल्हा प्रशासनाने एकीकडे नदीपात्रात न जाण्याचे आवाहन केले आहे. मात्र, त्याला न जुमानता वाळूमाफियांचे ट्रॅक्टर नदीपात्रात जाऊन वाळूउपसा करताना दिसतात. त्यांना ना आपल्या जिवाची पर्वा ना कुटुंबीयांच्या पालनपोषणाची. पाऊस सुरू असताना वाळू उपशावर महसूल प्रशासन केव्हा कारवाई करणार, असा प्रश्‍न यानिमित्त उपस्थित होत आहे.