Jalgaon Banana Damage : रावेर तालुक्यात वादळी तडाख्यात 51 कोटींची केळी भुईसपाट

Jalgaon Banana Damage : तालुक्यात मे महिन्यात झालेल्या वादळी पावसाच्या तडाख्यामुळे ४४ गाव शिवारातील १ हजार ९५० शेतकऱ्यांच्या १ हजार १४८ हेक्टर क्षेत्रातील केळी पिकांचे एकूण ५१ कोटी रुपयांचे नुकसान झाल्याचा पंचनामा करण्यात आला आहे. हा अहवाल शासनाकडे पाठविण्यात आला आहे. तालुक्यात मे महिन्यात दोन ते तीन वेळा वादळी पावसाचा तडाखा बसला होता. आज महसूल, कृषी विभागाच्या कर्मचाऱ्यांनी केळी नुकसानीचे पंचनामे केले. ( 51 crore worth of bananas damaged by storm in Raver taluka )

नुकसानीचे वस्तुनिष्ठ पंचनामे तयार करून वरिष्ठांना अहवाल पाठविण्यात आला. तालुक्यात प्रतिवर्षी केळी उत्पादक शेतकऱ्यांचे वादळामुळे नुकसान होते. मात्र त्या प्रमाण नुकसान भरपाई मिळत नाही. शासनाने नुकसान भरपाई शासनाच्या हेक्टरी ४ लाख रुपये प्रमाणे द्यावी, अशी मागणी केळी उत्पादक शेतकऱ्यांनी केली आहे. (latest marathi news)

रावेर तालुक्यात केळी बागांचे मोठ्या प्रमाणावर नुकसान झाले असून, कृषी विभाग व महसूल विभागाचे नुकसानीचा अंतिम अहवाल शासनाकडे सादर केला आहे. वादळी वाऱ्यामुळे १ ते ३१ मे दरम्यान रावेर तालुक्यातील ४४ गावांमधील ऐन कापणीला आलेली केळी जमीनदोस्त झाली. लागवडी क्षेत्र २३०२ हेक्टर पैकी तब्बल ११४८.३४ हेक्टर केळी जमीनदोस्त झाली.

त्यात सर्वाधिक नुकसान झालेली गावे, शेतकरी संख्या व हेक्टर क्षेत्र असे : पुरी ११३ शेतकरी, ११३.७६ हेक्टर क्षेत्र, रोझोदा ११४ शेतकरी, ८७.७४ हेक्टर क्षेत्र, खिरोदा प्र यावल २२४ शेतकरी २७६ हेक्टर क्षेत्र, कळमोदा १४० शेतकरी १३२ हेक्टर क्षेत्र, सावखेडा १७१ शेतकरी १८७.४७ हेक्टर क्षेत्र, अटवाडा १२७ शेतकरी, १९५.५६ हेक्टर क्षेत्र, यासह रावेर तालुक्यातील एकूण ४४ गाव शिवारातील १९५० शेतकऱ्यांचे ११४८.३४ हेक्टर क्षेत्रातील केळी पिकांचे सुमारे ५१ कोटी ३ लाख २२ हजार २९६ रुपयांचे नुकसानीचा अंतिम अहवाल तहसीलदार बी. ए. कापसे कृषी आधिकारी भाऊसाहेब वाळके यांनी शासनाकडे सादर केला आहे.