Jalgaon Kishore Sonawane Murder Case : मुख्य संशयितांचा शोध सुरू; 7 संशयितांना वाढिव कोठडी

Jalgaon Kishore Sonawane Murder Case : कालिंकामाता मंदिराजवळील हॉटेल भानूमध्ये २२ मेस रात्री झालेल्या किशोर सोनवणे याच्या हत्येप्रकरणी पोलिसांनी सात संशयितांना अटक केली असून, त्यांना न्यायालयाने वाढीव पोलिस कोडठीत रवाना केले आहे. मुख्य संशयित नीलेश सपकाळे, अमोल छगन सोनवणे आकाश सपकाळे यांच्यासह इतर तीन संशयितांचा शोध सुरू आहे. (jalgaon Kishore Sonawane Murder Case hunt for main suspects)

असोदा रोडवरील किशोर सोनवणे मित्रांसोबत हॉटेल भानूमध्ये जेवण करीत असताना, दहा ते अकरा सशस्त्र गुंडांनी हल्ला चढवून त्याची निघृण हत्या केली होती. हॉटेलच्या सीसीटीव्ही फुटेजवरून संशयितांची ओळख पटविण्यात येत असून, पोलिसांनी रूपेश सुभाष काकडे, रूपेश मनोहर सोनार, प्रशांत ऊर्फ आकाश युवराज सपकाळे, ईश्वर ऊर्फ दुर्लभ नथ्थू सपकाळे, मयूर विनोद कोळी, प्रशांत सुभाष काकडे, ईश्वर सुभाष काकडे यांना अटक केली आहे.

संशयितांची सोमवारी (ता. २७) पोलिस कोठडीची मुदत संपल्याने त्यांना न्यायालयात हजर करण्यात आले. न्यायालयाने सर्व संशयितांना ३० मेपर्यंत वाढीव पोलिस कोठडीत रवाना केले आहे. (latest marathi news)

मकोका लागणार

गुन्ह्यातील संशयितांनी संघटित प्रकारे अनेक गुन्हे केल्याचे आढळून आले आहे. मास्टर माईंड नीलेश सपकाळे व त्याच्या टोळीला मकोका अंतर्गत कारवाई करण्याबाबत कायदेशीर बाबी तपासण्यात येत असल्याचे पोलिस अधीक्षक डॉ. महेश्वर रेड्डी यांनी पत्रकार परिषदेत सांगितले.

चौकशींतर्गत होणार कारवाई

संशयितांची शनिपेठ पोलिसांसोबत मैत्री असल्याची तक्रार मृताच्या कुटुंबीयांनी पोलिस अधीक्षक कार्यालयात केली असून, त्या तक्रारीच्या अनुषंगाने संबंधित पोलिसांची खातेंतर्गत चौकशी पोलिस उपअधीक्षक संदीप गावित यांच्याकडे सोपविण्यात आली असून, तक्रारीत तथ्य आढळल्यास संबंधितांवर प्रचलीत कायद्याप्रमाणे कारवाई करण्यात येईल, असे डॉ. रेड्डी या वेळी म्हणाले.