Jalgaon News : वयोवृद्ध पित्याच्या शेतावर फिरवला रोटावेटर; मालमत्तेच्या हिस्यावरुन मुलाचा प्रताप

जळगाव : हनुमंतखेडे (ता. एरंडोल) येथील रहिवासी तथा नंदुरबार जिल्‍ह्याचे अप्पर जिल्‍हाधिकारी महेश पाटील यांच्या वडिलांनी त्यांच्याविरुद्ध कासोदा पोलिस ठाण्यात तक्रार दिली आहे. वाटे हिस्यासाठी शेतातील उभ्या (गहू-हरबरा) पिकावर रोटावेटर फिरवून नुकसान केल्याचे तक्रारीत नमूद केले आहे.

वडिलांनी दुसरे लग्न केल्याने मुलाने वडिलोपार्जित मालमत्तेत हिस्सा मिळावा, यासाठी न्यायालयात खटला दाखल केला. वाटणीपूर्वी एरंडोल तहसीलदारांकडे सुनावणी झाली. त्यावेळेस भास्कर पाटील यांनी पिकाची काढणी झाल्यावर दोन महिन्यांनी मी वाटणी हिस्सा देण्यास तयार असल्याचे सांगितले.

मात्र, महसूल यंत्रणेने एक दिवस अगोदर दरावर नोटीस चिटकवून भास्कर पाटील उपचारार्थ दाखल असताना, १९ डिसेंबरला प्रशासकीय लवाजमा घेवून उभ्या पिकावर रेाटावेटर फिरवून वाटणी केली. यामुळे भास्कर पाटील यांचे लाखोंचे नुकसान झाले असून, याबबात त्यांनी कासोदा पोलिस ठाण्यात अपर जिल्‍हाधिकारी मुलाविरुद्ध तक्रार दिली आहे.