Jalgaon News : आरटीओ कार्यालयाच्या प्रश्नावर शुक्रवारी ‘रास्ता रोको’

Jalgaon News : येथील प्रस्तावित आरटीओ कार्यालय व आदिवासी प्रकल्प कार्यालय भडगाव येथे व्हावे, यासाठी आंदोलनाची दिशा ठरविण्यासाठी सर्व पक्षीय बैठक घेण्यात आली. या बैठकीत सर्वपक्षीय प्रतिनिधीनी 'मी भडगावकर' म्हणून आपली भूमिका मांडत आरटीओ कार्यालय, आदिवासी प्रकल्प कार्यालयासाठी एकजुटीने लढा देण्याचे ठरविण्यात आले.

‘मी भडगावकर....आम्ही भडगावकर’ हा एकच नारा देत शुक्रवारी (ता. २३) रास्ता रोको आंदोलन करण्याचे निश्चित करण्यात आले. (Stop road movement on question of RTO office)

भडगाव येथे प्रस्तावित आरटीओ कार्यालय चाळीसगाव येथे पळविण्यात आले. तसेच आदिवासी प्रकल्प कार्यालयाबाबत देखिल हीच गत आहे. यामुळे भडगावकर संतप्त झाले आहेत. पुढील लढा उभारण्यासाठी आयोजित बैठकीस सचिन चोरडिया, अनिल वाघ, लखीचंद पाटील, सोमनाथ पाटील, सुयोग जैन, हर्षल पाटील,

सचिन पाटील, रवींद्र सोनवणे, इम्रान अली, योजना पाटील, शंकर मारवाडी, विजय भोसले, संजय सोनवणे, मनोहर चौधरी, डॉ. निळकंठ पाटील, विलास नेरकर, दिलीप शेंडे, रतिलाल महाजन, किरण शिंपी, आण्णा मोरे, नीलेश पाटील, प्रा. उत्तमराव पाटील, अमोल पाटील, ॲड. नीलेश तिवारी, नीलेश मालपुरे आदी शेकडोंच्या संख्येने भडगावकर उपस्थित होते.

बैठकीत सोमनाथ पाटील, शंकर मारवाडी, विजय भोसले, अनिल वाघ, इम्रान अली सय्यद, डॉ. निळकंठ पाटील, भय्यासाहेब पाटील, चौधरी, परदेशी, हाजी जाकीरशेठ, विजय सांळुखे, संजय पवार यांनी आंदोलन संदर्भात मते मांडली.

पक्षीय जोडे बाजूला काढून भडगावकर म्हणून एक व्हा. २०११ पासून आरटीओ कार्यालय आंदोलनास सुरवात झाली आहे. याबाबत शुक्रवारी (ता. २३) रास्तारोको करण्यात येणार असून, तो काळा दिवस पाळून आंदोलन करावे.

रास्ता रोकोसाठी ग्रामीण भागात जनजागृतीसाठी तालुक्यातील गावागावात दवंडी देण्यात यावी. आपण अन्याय सहन करत राहणार का? असाच अन्याय होत राहिला तर आपली पुढील पिढी आपल्याला माफ करणार नाही.

तसेच ज्यांना जे शक्य आहे. त्यांनी योगदान द्यावे, असे मते मांडून सर्वानुमते आंदोलनासंदर्भात आठ ठराव या बैठकीत पारीत करण्यात आले. आंदोलनाची दिशा या आठ ठरावानुसारच राहील, असे निश्चित करून बैठकीनंतर शुक्रवारच्या रास्ता रोको आंदोलनाबाबत तहसीलदार, पोलिस निरीक्षक यांना निवेदन देण्यात आले.