भडगाव : महाविकास आघाडीकडून जळगाव लोकसभेसाठी पारोळ्याचे माजी नगराध्यक्ष करण पवार यांना उमेदवारी मिळण्याचे चिन्हे आहेत. त्यादृष्टीने आज जोरदार हालचाली झाल्याचे पहावयास मिळाले. करण पवारांना उमेदवारी देऊन शिवसेना उबाठा गट भाजपला जोरदार धक्का देण्याच्या तयारीत आहे. भाजपने स्मिता वाघ यांची जळगाव लोकसभेसाठी उमेदवारी जाहीर करून मोठी आघाडी घेतली आहे. (Jalgaon Lok Sabha Election)
मात्र महाविकास आघाडीकडून अद्याप उमेदवाराची चाचपणी सुरू असून शिवसेना उबाठा गट भाजपसमोर तगडा उमेदवार उभा करण्याच्या तयारीत आहे. अमळनेरच्या अॅड. ललिता पाटील यांनी भाजपमधून ठाकरे गटात प्रवेश केला. त्यामुळे त्यांना उमेदवारी मिळेल असे वातावरण तयार झाले. त्यादृष्टीने पाटील यांनी भेटीगाठी घ्यायला सुरवात केल्या.
मात्र भाजपला आव्हान देण्यासाठी ठाकरे गटाकडून तुल्यबळ उमेदवाराचा शोध सुरूच होता. भाजपने विद्यमान खासदार उन्मेष पाटील यांना डावलण्याने तेही अंतर्गत नाराज होते. त्यामुळे त्यांचेच जवळचे मित्र असलेले करण पवारांना ठाकरे गटाने गळाला लावल्याचे बोलले जात आहे.
पवारांची पुरस्कृतची मागणी
करण पवारांनी महाविकास आघाडीकडे अर्थात शिवसेना पक्षप्रमुख उद्धव ठाकरेकडे अपक्ष उमेदवारी करतो अन् तुम्ही मला पुरस्कृत करा असा प्रस्ताव दिला होता. मात्र ठाकरेंनी याला मान्यता दिली नाही. त्यामुळे करण पवारांनी हाती मशाल घेण्याचे मान्य केल्याचे राजकीय सूत्रांनी सांगितले. त्यांना भाजपचे नाराज असलेले खासदार उन्मेष पाटील हे ताकद देणार असल्याचे सांगितले जात आहे. (Jalgaon Political News)
..तर लढत चुरशीची होईल
करण पवारांना ठाकरे गटाने जळगाव मतदारसंघात भाजपच्या स्मिता वाघांसमोर मैदानात उतरविल्यास ते भाजपसमोर तगडे आव्हान उभे करू शकतात. त्यांचा पारोळा, एरंडोल, भडगाव तालुक्यात चांगला जनसंपर्क आहे. चाळीसगावात मित्र असलेले उन्मेष पाटलांची साथ त्यांना मिळू शकते. भाजपमधील दुखावलेल्या मंडळीची अंतर्गत मदत त्यांना मिळू शकते.
महाविकास आघाडीतील तिन्ही पक्षाची ताकद त्यांना बळ देणारी ठरेल. याशिवाय त्यांचे काका व राष्ट्रवादी शरद पवार गटाचे नेते, माजी पालकमंत्री हेही पुतण्यासाठी सुप्त ताकद लावतील असे सांगितले जाते. एकूणच त्यांची उमेदवारी भाजपसाठी डोकेदुखी ठरू शकते असा कयास राजकीय मंडळींकडून व्यक्त केला जात आहे.
कोण आहेत करण पवार?
करण पवारांनी राष्ट्रवादी काँग्रेसमधून भाजपत प्रवेश केला होता. यावेळी त्यांनी काका तथा माजी पालकमंत्री डॉ. सतीश पाटील यांना धक्का दिला होता. भाजपकडून त्यांनी एरंडोल विधानसभेसाठी तयारी सुरू केली होती. मात्र भाजप-शिवसेनेची युती झाल्याने त्यांची उमेदवारी डावलली गेली. ते पारोळ्याचे माजी लोकनियुक्त नगराध्यक्ष आहेत तर त्यांचे वडील जिल्हा परिषदेचे माजी सदस्य आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
