Jalgaon Crop Lone : हजारो शेतकरी पीककर्जापासून वंचितच; अनिष्ट तफावतीतील विकास सोसायटीतर्फे विलंब

Jalgaon Crop Lone : अनिष्ट तफावतीतील विकास सोसायटीच्या सभासदांना अद्यापही कर्जवाटपास विलंब होत आहे, तर दुसरीकडे मात्र इतर विकास सोसायटीमार्फत ८० टक्के पीक कर्जवाटप झाल्याने शेतकऱ्यांमध्ये विषमता निर्माण झाली आहे. अनिष्ट तफावतीत गेलेल्या विविध कार्यकारी सोसायट्यांकडून पीक कर्जवाटप अधिकार काढून ते जिल्हा मध्यवर्ती बँकेने स्वतःकडे घेतले आहेत. ( Thousands of farmers are deprived of crop loan )

अमळनेर तालुक्यात अशा १४ संस्था असून, संस्थांच्या सभासद शेतकऱ्यांना कर्ज घेण्यासाठी बँकेचा भला मोठा अर्ज, त्यावर जामीनदार सह्या व इतर प्रक्रिया पूर्ण कराव्या लागणार आहेत. पीक कर्जवाटप सुरू करून महिना उलटला तरीही अनिष्ट तफावतीतील सोसायटीच्या शेतकऱ्यांना अद्यापही कर्ज वाटप झालेले नाही.

दुसरीकडे मात्र इतर विकास सोसायटीच्या शेतकऱ्यांना कर्जवाटप सुरू झाले असून, ८० टक्के वाटप झाल्याने त्या शेतकऱ्यांचे बियाणे खरेदी, मशागत, खते खरेदी सुरू झाली आहे. कर्ज न मिळालेल्या शेतकऱ्यांची शेतीकामे केव्हा सुरू होतील?, वेळेवर पेरणी होईल का, असे प्रश्‍न उपस्थित होत आहेत. (latest marathi news)

''जिल्हा बँकेने निम्मे कर्ज रोखीने देण्याचा ठराव केला असला, तरी शेतकऱ्यांना बँकेकडून बँकेच्याच मायक्रो एटीएमने पैसे दिले जात आहेत. त्यात २५ हजार रुपयांसाठी २० रुपये जादा फी मोजावी लागते आहे. एका वेळी फक्त ७५ हजार रुपये मिळू शकतात. अमळनेर तालुक्यात अनिष्ट तफावतीच्या सोसायटीच्या २२०० शेतकऱ्यांना जिल्हा बँकेतर्फे कर्जवाटप करायचे आहे. मात्र, १२०० शेतकऱ्यांनीच अर्ज भरले आहेत. ते जिल्हा शाखेकडे रवाना करण्यात आले आहेत. मंजुरी आल्यावर कर्जवाटप केले जाईल.''-अनिल अहिरराव, उपविभागीय व्यवस्थापक, अमळनेर

''बाजार समितीच्या शाखेकडे ३५ विकास सोसायट्या आहेत. ८० टक्के कर्ज म्हणजे १८ कोटी रुपये वाटप झाले आहेत आणि जिल्हा बँकेच्या धोरणानुसारच मायक्रो एटीएमचे २० रुपये चार्ज लावले जात आहेत.''- सागर पाटील, बाजार समिती शाखा व्यवस्थापक, अमळनेर