Jalgaon News : कळमसरे येथे आज भवानीमातेचा यात्रोत्सव! नवस फेडण्यासाठी भाविकांची मोठी गर्दी

कळमसरे (ता. अमळनेर) : येथील भवानी मातेचा यात्रोत्सव मंगळवारी (ता. १६) होणार असून, दरवर्षी चैत्रशुद्ध अष्ठमिला हा यात्रोत्सव होत असतो. या यात्रोत्सवाला शतकी परंपरा असून, भाविकांची नवस फेडण्यासाठी मोठ्या प्रमाणात गर्दी होत असते. गावाच्या दक्षिणेला लहान भवानी मातेचे मंदिर असून, गावापासून दोन किलोमीटर अंतरावर शहापूर रस्त्यालगत मोठ्या भवानी मातेचे मंदिर आहे. (Jalgaon Yatra festival of Bhavani Mata today at Kalamsare)

गेल्या शंभर वर्षांपूर्वी या दोन्ही भवानी मातेच्या मंदिरांची स्थापना केली असल्याचे सांगितले जाते. मोठी भवानी व लहान भवानी माता या दोन्ही बहिणी असून, जागृत देवस्थान असल्याचीही महती गावासह भाविकांकडून सांगितले जाते. या यात्रोत्सवादरम्यान गावासह बाहेरील भाविकही वरणबट्टीचा नवस या ठिकाणी फेडतात.

नवस पूर्ण झाल्याचाही भाविकांकडून बोलले जाते. यात्रोत्सवात मोठ्या भवानी मातेच्या मंदिरावर सर्वांत अगोदर मान देऊन यात्रोत्सवाला सुरवात होते. पहाटे मोठ्या भवानी मातेचा भक्त दंगल बडगुजर ध्वज चढवितात.

त्याचप्रमाणे लहान भवानी मातेच्या मंदिरावर श्रावण चौधरी यांच्या परिवाराकडून परंपरेनुसार ध्वज चढविला जातो. यानंतर महाआरती होऊन दर्शनासाठी भाविकांची मोठ्या प्रमाणात गर्दी होते. लहान भवानी मातेचे भक्त गुलाब महाजन हे वर्षभर पूजा- अर्चा करतात.(latest marathi news)

अष्टमीच्या दिवशी गावातील माळी समाजातील सैंदाणे परिवाराची कुलदेवता इंदासीमाता व नवमीच्या माळी समाजातील वाघ परिवाराची कुलदैवत इंदासी माता यांचेही या ठिकाणी वेगवेगळे कुलदैवत मंदिराची स्थापना केली असून, गावात दरवर्षी सुमारे चाळीस ते पन्नास नवसाच्या मानता असल्याने प्रत्येक चौकात नवसाच्य मानता असतात.

यामुळे गावात पाहुणे मंडळींची मोठ्या प्रमाणात गर्दीही होते. दरम्यान, या यात्रोत्सवात विविध खेळण्यांची दुकाने, पाळणेवाले दाखल झाले असून, रात्री मनोरंजनासाठी लोकनाट्य तमाशाचे आयोजनही केले आहे.

या दोन्ही भवानी मातेच्या मंदिरावर विद्युत रोषणाई केली असून, ग्रामपंचायतीने व कळमसरे महाराष्ट्र विद्युत कंपनीच्या कर्मचाऱ्यांनी मंदिरापर्यंत विजेची सोय केली असून, या यात्रोत्सवाला परिसरातील भाविकांनी उपस्थिती देऊन यात्रेची शोभा वाढवावी, असे आवाहन किरणसिंह राजपूत यांनी केले आहे.