Jalgaon : प्लॉट विक्रीचे पैसे मागणाऱ्या भाऊ-बहिणीवर चाकू हल्ला

जळगाव : प्लॉट विक्रीचे पैसे दिले नाही म्हणून विचारणा करणाऱ्या महिलेसह तिच्या लहान भावाला शिवीगाळ करून चाकूने वार करत जखमी केल्याची घटना घडली. याप्रकरणी रामानंदनगर पोलिस ठाण्यात तीन जणांवर गुन्हा दाखल करण्यात आला आहे.

तक्रारीत नमुद केल्याप्रमाणे, शबाना शेख सलीम (वय ३५, रा. न्यू ख्वाजानगर, पिंप्राळा हुडको) ही महिला आपल्या कुटुंबीयांसह वास्तव्याला आहेत. त्यांनी त्यांचा प्लॉ‍ट विक्री केला होता. याचे पैसे शरिफ शेख याला मागितले असता याचा राग येउन गुरूवारी (ता. १९) सकाळी ७.३० वाजेच्या सुमारास महिलेसह तिचा भाऊ नईम शेख यांना शिवीगाळ करून चाकूने वार करून जखमी केले. तसेच आसिफ शेख आणि अहमद शेख (पूर्ण नाव माहित नाही) यांनी नईमला मारहाण करून डोक्यात दगड टाकून दुखापत केली. याप्रकरणी शबाना शेख सलीम यांनी रामानंदनगर पोलिस ठाण्यात धाव घेउन तक्रार दिली. त्यांच्या तक्रारीवरून शुक्रवारी (ता. २०) संशयित आरोपी शरिफ शेख, आसिफ शेख आणि अहमद शेख यांच्याविरोधात रामानंदनगर पोलिस ठाण्यात गुन्हा दाखल करण्यात आला आहे. पुढील तपास पोलिस नाईक विनोद सूर्यवंशी करीत आहे.