Jalgaon Crime News: हनुमंतखेड्यातील तरुणाच्या मृत्यू प्रकरणाला कलाटणी; 3 तमासगीरांना अटक

Jalgaon Crime News: बदरखे (ता. पाचोरा) येथील पेमबुवांच्या यात्रोत्सवात तमाशा फडाजवळ मृतावस्थेत आढळलेल्या हनुमंतखेडा (ता. सोयगाव) येथील मनोज निकमच्या मृत्यू प्रकरणाला वेगळी कलाटणी मिळाली आहे. मनोज निकमचा खून नसून तमाशा मंडळाच्या वाहनाखाली येऊन त्याचा मृत्यू झाल्याची कबुली तमाशा कलावंतांनी दिली.

अपघात माहीत असतानाही तो लपवला या आरोपासह तमाशातील तिघांनाम पोलिसांनी चौकशीअंती अटक केली आहे. त्यांना दोन दिवसांची पोलिस कोठडी सुनावण्यात आली असून कोठडीत ते आणखीन काय माहिती देतात याकडे लक्ष लागून आहे. (Manoj Nikam was killed due fell under vehicle of Tamasha Mandal jalgaon crime news)

हनुमंतखेडा येथील मनोज निकम हा रविवारी (ता. २४) बदरखे येथील यात्रेत तमाशा पाहण्यासाठी गेला होता. सोमवारी (ता. २५) सकाळी तमाशा फडाजवळ त्याचा मृतदेह आढळल्यानंतर खळबळ उडाली होती.

नगरदेवळा पोलिसांना माहिती मिळताच त्यांनी घटनास्थळी जाऊन पंचनामा करून मृतदेह पाचोरा ग्रामीण रुग्णालयात आणला होता. परंतु मयताच्या अंगावर असलेल्या संशयास्पद खुणा पाहून मृतदेह जळगाव येथील शासकीय रुग्णालयात शवविच्छेदनासाठी पाठवण्यात आला होता.

त्यानंतर मनोज निकम याच्यावर हनुमंतखेडा येथे अंत्यसंस्कार करण्यात आले होते. दरम्यान, त्याच्या कुटुंबातील नंदकिशोर निकम यांनी मनोजचा खून झाल्याची तक्रार पोलिसांना दिल्याने पोलिसांनी खुनाचा गुन्हा दाखल केला होता. वरिष्ठ पोलिस अधिकाऱ्यांनी या प्रकरणात लक्ष घालून या प्रकरणाचा तपास पोलिस निरीक्षक राहुल खताळ यांच्याकडे सोपवला. श्री. खताळ यांनी त्वरित तपासाची चक्रे गतिमान केली.

कोणताही ठोस पुरावा नसताना केवळ तमाशा फडाजवळ मृतदेह आढळला, हा धागा पकडत त्यांनी सर्वात प्रथम शालिग्राम शांताराम रोहिणीकर या तमाशा मंडळावर लक्ष केंद्रीत केले. त्यातील काही कामगार व कलावंतांना त्यांनी ताब्यात घेऊन विचारपूस केली असता, सुरवातीला त्यांनी उडवाउडवीची उत्तरे दिली. मात्र, खाकीचा प्रसाद मिळताच ते पोपटासारखे बोलू लागले. तमाशाची गाडी अंधाऱ्या रात्रीत मागे घेत असताना त्या वाहनाखाली येऊन मनोजचा मृत्यू झाला.

याची कोणाजवळही वाच्यता करू नका, असे एकमेकांना बजावत त्यांनी मनोजचा मृतदेह उचलून बाजूला ठेवला व ते दुसरीकडे निघून गेले होते. अशी कबुली त्यांनी दिल्याने पोलिसांनी योगेश उर्फ ज्ञानेश्वर संतोष सूर्यवंशी (वय २५, रा. आर्वी, ता. धुळे), सुनील हिरालाल गोपाळ (वय २३, रा. गलंगी, ता. चोपडा) व विनोद उत्तम जोगी (वय २६, रा. टाकखेडा (ता. एरंडोल) या तिघांना अटक केली आहे. त्यांना न्यायालयात हजर केले असता, न्यायालयाने दोन दिवसांची पोलिस कोठडी सुनावली. दरम्यान, मनोजचा खरंच अपघात झाला की त्याचा घात करण्यात आला याच्या मुळाशी जाण्याचा पोलिस प्रयत्न करत आहेत.