ट्रकचे चाक अचानक निघून धडकले; युवकाचा मृत्‍यू

भुसावळ (जळगाव) : साकेगावजवळ महामार्गावर (National highway) धावत्या ट्रकचे चाक अचानक निखळून समोरून येत असलेल्‍या दुचाकीला जोरदार (Accident) धडकले. यात दुचाकीस्वाराचा मृत्‍यू झाला. सदर घटना दुपारी दीड वाजेच्या सुमारास घडली. (bhuasawal highway truck accident one death)

भुसावळकडून जळगावकडे येणाऱ्या सिमेंटने भरलेला ट्रक (क्र. एमएच. १५. एफव्ही. ९९९४) चे मागचे टायर अचानक निघाले. यामुळे ट्रक चालकाचा गाडीवरील ताबा सुटला. सदर घटना राष्ट्रीय महामार्गावरील साकेगावजवळ दुपारी घडली. अपघातात एका युवकाला जीव गमवावा लागला. घटना पाहणाऱ्यांच्या हृदयाचा ठोकाच चुकला.

अन्‌ ट्रकचे चाक दुचाकीवर

दुचाकीने साकेगावकडून भुसावळकडे जात असताना बादल गोकुळ पवार (रा. साकेगाव, ता.भुसावळ) याच्या दुचाकीवर ट्रकचे निघालेले चाक धडकले. अचानक घडलेल्‍या या प्रकारामुळे तरूणाला देखील गाडीवर नियंत्रण मिळविता आले नाही. ट्रकचे चाक धडकल्‍याने तरूण गंभीर जखमी झाला होता. यानंतर त्‍यास जखमी अवस्‍थेत तातडीने खासगी रूग्णालयात उपचारार्थ दाखल करण्यात आले. मात्र उपचार सुरु असताना काही वेळातच त्याचे निधन झाले.