जळगाव-औरंगाबाद महामार्गासाठी शेगाव, बारामतीहून वाळू; कामात १८४ ब्रास अवैध वाळू

जळगाव : जळगाव- औरंगाबाद महामार्गाच्या (Jalgaon aurangabad highway) कामात भवानी फाटा (नेरी) जळगाव ते औरंगाबाद रस्तादरम्यान २० किलोमीटरच्या कामासाठी १८४ ब्रास अवैध वाळूचा वापर करण्यात आला. याप्रकरणी जामनेरचे तहसीलदार अरुण शेवाळे यांनी महामार्गाचे कंत्राटदार स्पायरोधारा जे. व्ही. कन्स्ट्रक्शनवर वाळूसाठ्याच्या बाजारभावाच्या पाचपट ३८ लाख चार हजार १६ रुपयांची दंडात्मक कारवाई केली. त्याबाबतची नोटीस कंपनीचे प्रकल्प व्यवस्थापक पी. व्ही. श्रीनिवास यांना तहसीलदारांनी दिली आहे. (jalgaon-aurangabad-highway-work-valu-baramati-and-shegaon)

जिल्हाधिकारी अभिजित राऊत (Jalgaon collector abhijit raut) यांच्याकडे याबाबत तक्रार प्राप्त झाली होती. त्यानुसार भवानी फाटा, नेरी जळगाव ते औरंगाबाद रस्ता या २० किलोमीटरच्या कामासाठी अवैध वाळूचा उपयोग झाला आहे. याबाबत जिल्हा खनिकर्म अधिकारी व सार्वजनिक बांधकाम विभागाकडून त्या कामाची प्रत्यक्ष मोजणी केली असता एक हजार पाच ब्रास वाळू या गौण खनिजाचा अवैध साठा आढळून आला आहे.

वाळूची शेगाव येथून उचल

वाळूसाठ्याचा जामनेर तहसीलदार अरुण शेवाळे, जिल्हा खनिकर्म अधिकारी दीपक चव्हाण, सार्वजनिक बांधकाम विभागाचे अधिकारी, तलाठी, तक्रारदार गुप्ता यांच्या उपस्थितीत कंपनीच्या सुनसगाव बुद्रुक येथील साइटवर एक हजार पाच ब्रास वाळूसाठ्याचा पंचनामा करण्यात आला. त्या पंचनाम्याच्या अनुषंगाने कंपनीने जामनेर तहसीलदारांना खुलासा सादर केला आहे. खुलाशाअंती कंपनीने १८४ ब्रास वाळूची शेगाव (जि. बुलडाणा) येथून उचल केलेली दिसते.

३८ लाख रूपयांचा दंड

जळगावच्या अपर जिल्हाधिकारी यांनी वाळू उपशाबाबतचे परमीट बुलडाणा येथील जिल्हा खनिकर्म अधिकाऱ्यांकडे पडताळणीसाठी पाठवले होते. त्यानुसार त्यांनी पत्र पाठवले आहे. पावत्यांनुसार केलेल्या वाळूची उचल ही शेगाव ते बारामती व आळंदी येथे केलेली दिसून येते. जामनेर तालुक्यातील कंपनीची साइट असलेले सुनसगाव बुद्रुक येथील कोणतीही पावती दिसून आलेली नाही. १८४ ब्रास वाळू ही अवैध उत्खनन करून वाहतूक केल्याचे स्पष्ट झाले. त्यामुळे प्रशासनाने ३८ लाख रुपये दंडाची नोटीस बजावल्याने खळबळ उडाली आहे.