चिंताजनक...अकरा जणांचा दिवसभरात मृत्यू; साडेचार हजाराचा टप्पा पुर्ण

जळगाव : जिल्ह्यात आज दिवसभरात 156 कोरोना बाधीत नवीन रूग्ण आढळून आले आहेत. यामुळे जिल्ह्यातील एकूण कोरोना बाधीतांची संख्या 4 हजार 586 झाली आहे. तर दुसरीकडे हॉटस्पॉट असलेल्या जळगाव शहरात 56 रुग्ण आढळून आल्याने जळगाव शहरातील बाधितांचा आकडा एक हजाराच्या वर पोहचला आहे. कोरोनाची लागण झालेल्यांमध्ये चिंताजनक परिस्थितीत असलेल्या एकूण 11 जणांचा आज मृत्यू झाला आहे.

आवर्जून वाचा - सावधान...लॉकडाउनमध्ये फिरणार तर काय होणार तुमच्यासोबत पहा; १३०० पोलिसांचा कडक बंदोबस्त

जिल्ह्यातील कोरोना संसर्गाची लागण होण्याचे प्रमाण वाढतेच आहे. नव्या कोरोना बाधितांमुळे जिल्ह्यात नवीन कंटेटमेंट झोनमध्ये देखील वाढ होत आहे. इतकेच नाही तर नवीन परिसरांची देखील यात भर होत आहे. कोरोनाची साखळी मोडीत काढण्यासाठी लॉकडाउन पुकारण्यात आला असला तरी गेल्या तीन चार दिवसांमध्येच जिल्ह्यातील कोरोना बाधितांचा आकडा पाचशे ते सहाशेंनी वाढला आहे. यामुळे आता लॉकडाउननंतर जिल्ह्यात किती प्रमाणात कोरोना रोखला जातो हेच पाहणे महत्त्वाचे ठरणार आहे. 

नक्‍की पहा - PHOTO : कोरोना वाढीचा बाजार...सात दिवसांचा लॉकडाउन पण गर्दी चिकार 

साडेचार हजाराचा पल्ला पार 
जिल्ह्यातील कोरोना बाधितांचा आकडा दिवसेंदिवस वाढत असून आज यात आणखी 156 रूग्णांची भर पडली आहे. नवीन रूग्णांमुळे जिल्ह्यात साडेचार हजार रूग्णांचा टप्पा गाठला गेला असून एकूण 4 हजार 586 इतकी संख्या झाली आहे. वाढत्या संख्येमुळे कोरोना हॉस्पिटलमध्ये देखील बेड अपुर्ण पडत असल्याची स्थिती निर्माण झाली आहे. 

11 कोरोनाबाधीतांचा मृत्यू 
कोरोनाची लागण झालेल्यांना बरे करण्यासाठी युद्ध पातळीवर उपचार सुरू आहे. परंतु, प्रतिकारशक्‍ती कमी असलेल्या रूग्णांना अधिक त्रास होवून त्यांचा मृत्यू होत आहे. अशा कोरोनाची लागण झालेल्यांमध्ये चिंताजनक परिस्थितीत असलेल्या एकूण 11 जणांचा आज मृत्यू झाला आहे. मृतांमध्ये जळगाव शहरातील 1, चाळीसगाव, एरंडोल व यावल तालुक्‍यातील प्रत्येकी 2, पारोळा, भुसावळ, भडगाव, रावेर या तालुक्‍यातील प्रत्येकी एक रुग्णांचा समावेश आहे. यामुळे जिल्ह्यात कोरोनामुळे मृत्यू झालेल्यांची संख्या ही 282 वर पोहचली आहे. 

असे आढळले रूग्ण 
आज नव्याने 156 रूग्णांची भर पडली आहे. यात जळगाव शहर 56, जळगाव ग्रामीण 18, भुसावळ 12, अमळनेर 7, चोपडा 8, पाचोरा 4, भडगाव 3, धरणगाव 7, यावल 3, एरंडोल 1, जामनेर 13, रावेर 12, मुक्ताईनगर 10 , बोदवड 1 व अन्य जिल्ह्यातील 1 याप्रमाणे रुग्णांचा समावेश आहे.