गुढीपाडव्याचा सण..ना नवीन वाहनांची खरेदी ना सोन्याची खरेदी

जळगाव ः मराठी नववर्षाचा मंगळवारी (ता. १३) पहिला दिवस (अर्थात चैत्र महिना) गुढीपाडवा आज हिंदू बांधवांनी घरोघरी गुढी उभारून तिचे पूजन करून साजरा केला. साडेतीन मुहूर्तापैकी एक असलेला गुढीपाडव्याला नवीन वाहन, सोने खरेदी केली जाते. काही इलेक्ट्रॉनिक वस्तूंची खरेदी करीत आनंद लुटतात. यंदा मात्र लॉकडाऊनच्या कडक निर्बंधामुळे नागरिकांना या वस्तूंची खरेदी करता आली नाही. यामुळे केवळ श्रीखंड, आम्रखंड, बासूंदीचा बेत आखून गुढीपाडव्याचा सण गोड करण्यात आला.

मराठी नववर्षाच्या पहिल्या दिवशी गुढीपाडव्याला राष्ट्रीय स्वयंसेवक संघातर्फे सकाळी संघाच्या पारंपारीक वेषभुषेत पथसंचलन केले जाते.पथसंचलन पारंपारीक वाद्य वाजवित होत असल्याने शिस्तीचे धडे मिळण्यासोबत सर्वांच्याच आकर्षणचा तो विषय ठरत होता. शस्त्रपूजनही केले जात असे. यंदा कोरोना सावटामुळे हे सर्व बंद होते. हिंदू बांधवांनी सकाळीच नवीन कपडे परिधान करून कुटूंबियांसोबत गुढी उभारली. यादिवशी कडूलिंबाच्या पानांचा रस करून दिला जातो.यामुळे आरोग्यवृ्ध्दी होते. त्यानंतर नातेवाईक, मित्र, मैत्रीणींना मोबाईलवरून किंवा फोन करून शुभेच्छा देण्यात आला.

सोने बाजार ठप्पच

या मुहूर्तावर सोने खरेदी मोठया प्रमाणात होते. जळगावला अस्सल सोन्याची बाजारपेठ म्हटली जाते. यामुळे राज्यभरातून नागरिक येथील सोने बाजारात खरेदीसाठी यादिवशी झुंबड करतात. यंदा अशी झुंबड पहावयास मिळाली नाही. यामुळे सोने बाजारातील आजची मोठी उलाढाल ठप्प होती असे सराफ व्यावसायीकांनी सांगितले.

वाहनेही जागेवरच

गुढीपाडव्याला हजारो नवीन वाहनांची विक्री होते. त्यासाठी नागरिक आगाउ बुकींगही करतात. अनेकांनी बुकींगही केली होती. मात्र कोरोनाचे निर्बंध असल्यान वाहन विक्रेत्यांना वाहनांची डिलेव्हरी ग्राहकांना करता आली नाही. अनेक नागरिकांचे वाहन खरेदी स्वप्न र्पूर्ततेसाठी काही काळ आता द्यावा लागणार आहे. हजारो वाहनांच्या विक्रीतून कोट्यावधीची उलाढाल आज ठप्प झाली होती.