‘ब्रेक द चेन’ अंतर्गत विनाकारण प्रवास; तर महिनाभराचा पगार क्षणात जाणार

जळगाव : ब्रेक द चेन अंतर्गत लावण्यात आलेल्या निर्बंधांमध्ये अकारण प्रवास करण्याला बंदी घालण्यात आली आहे. यासाठी तब्बल १० हजारांच्या दंडाची आकारणी करण्यात येणार आहे. याबाबत जिल्हा प्रशासनाने आदेश काढले आहेत.

‘ब्रेक द चेन’ अंतर्गत शासनाने जाहिर केलेल्या नियमावलीनुसार अत्यावश्यक व टाळता न येण्याजोगा प्रवासा व्यतिरिक्त इतर कुठल्याही कारणांसाठी प्रवास करण्याची मुभा नाही. त्यासाठी परवानगी पास जिल्हाधिकारी कार्यालयाकडून निर्गमित केली जात नाही. नियमावलीत दिलेल्‍या कारणांशिवाय व नियमावलीतील नियमांचे पालन न करता केलेला प्रवास दहा हजार रुपयांपर्यंतचा दंडनीय अपराध असून याची तपासणी करण्यासाठी जिल्ह्यात पथके कार्यरत करण्यात आल्याचे जिल्हाधिकारी अभिजीत राऊत यांनी प्रसिध्दीपत्रकान्वये कळविले आहे.

आजपासून अंमलबजावणी

ब्रेक द चेन संदर्भातील नियमावलीची अंमलबजावणी जळगाव जिल्ह्यात २२ एप्रिलच्या रात्री आठ वाजेपासून अंमलात येणार आहे. ती १ मे २०२१ सकाळी सात वाजेपर्यंत अंमलात राहणार आहे. नियमावलीत नमूद केल्याप्रमाणे आंतर जिल्हा अथवा एका शहरातून दुसऱ्या शहरात प्रवास करण्यासाठी अत्यावश्यक व टाळता न येण्याजोगा प्रवास जसे वैद्यकीय उपचार, कुटुंबातील व्यक्तीचे अंत्यविधीला उपस्थित राहण्यासाठी अथवा जीवनावश्यक सेवा पुरवणे यासाठीच मर्यादित आहे. या कारणांसाठी करावयाच्या प्रवाशाला कुठल्याही परवानगी/पासची आवश्यकता नाही असेही जिल्हाधिकारी श्री. राऊत यांनी म्हटले आहे.