esakal | जळगाव जिल्‍ह्‍यात किराणा, दुधसाठी ठरली वेळ

बोलून बातमी शोधा

jalgaon lockdown
जळगाव जिल्‍ह्‍यात किराणा, दुधसाठी ठरली वेळ
sakal_logo
By
टिम इ सकाळ

जळगाव : कोरोनाचा प्रादुर्भाव कमी होत नसल्‍याने राज्‍यात कडक लॉकडाउन लावण्यात येणार आहे. तत्‍पुर्वी राज्‍यात किराणा, दुध आणि भाजीपाला विक्रीसाठी निश्‍चित वेळ ठरवून देण्यात आली आहे. त्‍याच अनुषंगाने जळगाव जिल्‍ह्‍यात देखील किराणा आणि दुध विक्रीसाठीची वेळ निश्‍चित करण्यात आली आहे.

कोविडचा प्रसार थांबविण्यासाठी शासनाने काही निर्बंध व मार्गदर्शक तत्त्वे जारी केले आहेत. महाराष्ट्रामध्ये कोरोनाचा प्रसार होण्याची शक्यता लक्षात घेता सदर निर्बंधांमध्ये काही फेरबद्दल केले आहेत. साथीचे रोग कायदा १८९७ च्या कलम दोन, तसेच आपत्ती व्यवस्थापन कायदा २००५ च्या तरतुदीनुसार हे बदल करण्यात येत असल्याची माहिती राज्याचे मुख्य सचिव सीताराम कुंटे यांनी दिली आहे. त्यानूसार केवळ सकाळी ७ ते ११ दरम्यानच किराणा, भाजीपाला, दुध, मांस मिळणार आहेत. १ मे २०२१ च्या सकाळी सात वाजेपर्यंत अंमलात राहतील. आज सायंकाळी आठपासून आदेश लागू राहतील.

या वेळेतच राहणार सुरू

सर्व किराणा दुकाने, भाजीपाला दुकाने, फळ विक्रेते, डेअरी, बेकरी आणि मिठाई दुकाने, सर्व खाद्यपदार्थांचे दुकान (चिकन, मटण, कोंबडी, मासे, अंडी सह) त्याचप्रमाणे कृषी अवजारे व कृषी उत्पादने, पाळीव प्राण्यांचे खाद्याची दुकाने, पावसाच्या हंगामासाठी साहित्य (वैयक्तीक व संघटनात्मक) सकाळी ७ ते ११ वाजेपर्यंत उघडे राहतील. वरील दुकानांमधून घरपोच सेवा देण्यासाठी सकाळी ७ वाजेपासून संध्याकाळी ८ पर्यंत मुभा असेल.

नियम शासन पत्रकानुसार

स्थानिक आपत्ती व्यवस्थापन जिल्हा प्रशासनाला वाटल्यास कलम दोन अंतर्गत काही गोष्टींना व सेवांना, राज्य आपत्ती व्यवस्थापन प्राधिकरणाची संमती घेऊन आवश्यक सेवा म्हणून घोषित करू शकते. या आदेशामध्ये नमूद केलेल्या गोष्टीं व्यतिरिक्त इतर सर्व अटी व नियम शासनाद्वारे जाहीर करण्यात आलेल्या पत्रकानुसारच असतील.