शारीरिक त्रास देत असल्यास, तसेच आत्महत्येचा विचार आल्यास त्या जिंदगी फाउंडेशनच्या हेल्पलाइन क्रमांकावर २४ तास कधीही संपर्क साधू शकतात.
जळगाव : जिंदगी फाउंडेशनच्या पदाधिकाऱ्यांनी राज्याच्या महिला व बालविकासमंत्री यशोमती ठाकूर यांची जळगाव दौऱ्यात भेट घेतली. या वेळी फाउंडेशनने महिलांसाठी सुरू केलेल्या ‘हेल्पलाइन’ उपक्रमाच्या फलकाचे अनावरण श्रीमती ठाकूर यांच्या हस्ते झाले. महिलांना कुणीही मानसिक किंवा शारीरिक त्रास देत असल्यास, तसेच आत्महत्येचा विचार आल्यास त्या जिंदगी फाउंडेशनच्या हेल्पलाइन क्रमांकावर २४ तास कधीही संपर्क साधू शकतात.
शाळा आणि महाविद्यालयाच्या किशोरवयीन मुला-मुलींसाठी सक्तीचे लैंगिक शिक्षण राज्य सरकारने सुरू करावे, या आशयाचे निवेदनही जिंदगी फाउंडेशनच्या पदाधिकाऱ्यांनी श्रीमती ठाकूर यांना दिले. जिंदगी फाउंडेशन दोन वर्षांपासून शाळा आणि महाविद्यालयातील विद्यार्थ्यांमध्ये जनजागृती आणि समुपदेशन करीत असलेल्या कार्याची श्रीमती ठाकूर यांनी माहिती घेतली.
या वेळी ‘महिला सुरक्षितता’ याविषयावर जिंदगी फाउंडेशनने तयार केलेले पोस्टर श्रीमती ठाकूर यांना भेट देण्यात आले. या कार्यक्रमाला फाउंडेशनच्या अध्यक्षा सुश्मिता भालेराव, सचिव अजय पाटील तसेच सदस्या निशिगंधा भालेराव उपस्थित होत्या.
...या क्रमांकावर साधा संपर्क
महिलांना कोणीही मानसिक किंवा शारीरिक त्रास देत असल्यास किंवा आत्महत्येचा विचार आल्यास ९५४५२८१०६८ या हेल्पलाइन क्रमांकावर संपर्क साधावा. संबंधित तक्रारीची तत्काळ दखल घेतली जाईल, असे आवाहन फाउंडेशनतर्फे करण्यात आले आहे.
